Святлана Калінкіна: «Беларускі партызан» папярэджанняў не атрымліваў

Улады так і не патлумачылі, за якія артыкулы заблакаваны незалежны сайт.

15 снежня незалежны беларускі сайт «Беларускі партызан» перастаў адкрывацца. Высветлілася, што яго заблакавалі паводле пастановы Міністэрства інфармацыі «за публікацыю забароненай інфармацыі».

Якія артыкулы «Белпартызана» парушаюць, на думку чыноўнікаў заканадаўства, пакуль невядома.

«Пачалося ўсё яшчэ ўчора, 14 снежня. Карыстальнікі «Атлант Тэлекам» пісалі, што не могуць адкрыць наш сайт. А 15 снежня высветлілася, што «Партызан» заблакаваны Мінінфармам, - распавяла «Нашай Ніве» журналістка Святлана Калінкіна, сузаснавальніца «Беларускага партызана». - Прычым, мы не ведаем, за што нас заблакавалі. Ніякіх папярэджанняў «Беларускі партызан» не атрымліваў, пасля блакавання таксама не было ніякіх тлумачэнняў з боку чыноўнікаў, якія з артыкулаў і што парушылі».