Маці выхаванца магілёўскай спецвучэльні: «Аднаму зламалі хрыбетнік, а іншым - псіхіку!»

Жыхарка Магілёва збіраецца звярнуцца ў Следчы камітэт.

- Прачытала артыкул пра тое, што выхаванцаў спецвучэльні збілі, і адчула шок! Зразумела, што сярод тых збітых падлеткаў быў і мой сын, - распавядае kp.by магіляўчанка Наталля, мама 16-гадовага Цімафея. - Праз тыдзень пасля ўцёкаў сын сказаў мне праз тэлефон: «Мама, нас пабілі». Я не надала значэння гэтым словам. Думала, што іх рамянём адлупцавалі ў мэтах выхавання...Атрымліваецца, што аднаму хлопцу зламалі хрыбетнік, а ўсім астатнім дзецям псіхіку!

Нагадаем, здарэнне адбылося ў канцы лістапада ў Магілёве. Шасцёра выхаванцаў спецвучэльні закрытага тыпу №2 зладзілі ўцёкі, але неўзабаве іх затрымалі. Два кіраўнікі спецвучэльні былі затрыманыя за перавышэнне паўнамоцтваў. У дачыненні да дырэктара і ягонага намесніка распачатая крымінальная справа. Як высветліла следства, двое мужчын, высвятляючы ў шасцярых выхаванцаў прычыны ўцёкаў, збілі іх.

Магіляўчанка Наталля, мама выхаванца магілёўскай спецвучэльні Цімафея, успамінае, як у дзень уцёкаў, 26 лістапада, да яе прыйшлі супрацоўнікі спецвучэльні.

- Адзін з супрацоўнікаў сказаў, што прыкладзе ўсе намаганні, каб іх адправілі ў калонію для непаўналетніх у Бабруйск. А ў мінулыя выходныя ў сына была бабуля. Яна заўважыла на ягоным твары ранкі, спытала пра іх. На што Цімафей адказаў: «Гэта я галіўся». Вядома, бабуля не паверыла яму. Сказала: «Ну што ты мне хлусіш? Каля вачэй галіўся?» Яны размаўлялі ў пакоі спатканняў, дзе былі супрацоўнікі ўстановы. У гэтую нядзелю я сама паеду да яго на спатканне. А ў панядзелак пайду ў Следчы камітэт, каб не быць галаслоўнай.

Са слоў Наталлі, у яе і раней узнікалі пытанні да спецвучэльні. Туды яе сын, як кажа магіляўчанка, патрапіў праз прагулы ў школе і за тое, што некалькі разоў быў затрыманы п'яным.

- Пасля таго, як ён адбыў год у спецвучэльні, мы разлічвалі, што Цімафея адпусцяць на 10-дзённы тэрмін дадому. Але гэтага не здарылася. Дырэктар спецвучэльні заявіў: «А ваш сын яшчэ нічога такога не зрабіў для нашай адміністрацыі, каб яго адпусцілі».

- Вы пыталіся, чаму ён збег са спецвучэльні?

- Ён сказаў: «Ты ведаеш, мама, а больш не было сіл трываць». Пытаюся: «А што трываць?» Кажа: «Ай, потым». Відаць, баяўся сказаць. Я і цяпер перажываю, каб яго не запалохалі. Цяпер кожныя выхадныя буду ў яго!