Скандальны вынік «пробнага перапісу»

«Пробны перапіс» насельніцтва ў пачатку кастрычніка праводзіўся ў Маладэчна.

Адзін з вынікаў апытання развенчвае галоўны беларускі міф пра тое, што ў краіне вельмі нізкі ўзровень беспрацоўя.

У Маладэчна больш за 9% насельніцтва не мае працы. Пра гэта паінфармавала на дакладзе ўрада, Нацыянальнага банка, аблвыканкамаў і Менскага гарвыканкама аб рабоце эканомікі за мінулы перыяд 2017 года старшыня Беларускага статыстычнага камітэта Іна Мядзведзева, піша «СН плюс».

«Мы насельніцтву задавалі пытанні аб тым, ці працаўладкаваныя яны, дзе яны знаходзяцца і дзе яны працуюць. У выніку 9,1% насельніцтва адказала нам, што яны беспрацоўныя, 5,5% насельніцтва наогул не адказала, то ёсць адмовілася адказваць на пытанне як па занятасці, так і па крыніцы існавання. Пра што гэта кажа? Гэта сведчыць аб тым, што альбо гэтыя людзі не працуюць, альбо ў гэтых людзей ёсць нейкі схаваны даход. І акрамя таго, кожны трэці чалавек, які быў апытаны ў ходзе «пробнага перапісу», заявіў, што ён не працуе на тэрыторыі рэгіёну», - адзначыла Іна Мядзведзева.

Яе словы паспрабаваў нівеліраваць прэм'ер-міністр Беларусі Андрэй Кабякоў. «Так, сапраўды ў Маладэчна вельмі вялікая колькасць людзей не занятая на тэрыторыі горада. Таму што яны знаходзяць сабе працу ў Менску, Радашковічах, Заслаўі», - заявіў ён. Але відавочна, што прэм'ер схітраваў, каб адвесці тэму ў іншае рэчышча і не акцэнтаваць на ёй увагу. Бо ў людзей не пыталіся, ці працуюць яны ў Маладэчна. Падчас апытання задавалася пытанне аб рабоце як такой.

Тым часам, паводле звестак Белстата, на канец верасня гэтага года ўзровень зарэгістраванага беспрацоўя ў раёне склаў 1,3%. Зразумела, што такая статыстыка нічога агульнага з рэальнай сітуацыяй не мае.