Незалежны журналіст дамогся спынення несправядлівай справы
3- 16.12.2017, 19:19
- 12,862
Суд упершыню апраўдаў гомельскага журналіста-фрылансера Кастуся Жукоўскага.
Суд Добрушскага раёна 15 снежня спыніў адміністрацыйную справу паводле артыкулу 22.9 КоАП (парушэнне заканадаўства аб СМІ) у дачыненні да гомельскага журналіста-фрылансера Кастуся Жукоўскага з прычыны адсутнасці складу правапарушэння.
Падставай для складання пратаколу стаў сюжэт «Белсату» «У Добрушы замест заробкаў - талоны на харчаванне», у якім былі фрагменты відэаздымак Жукоўскага. Але суддзя Яўген Мартынаў пастанавіў, што Жукоўскі заканадаўства не парушаў.
«Мабыць, пастанова была прынятая наверсе. У гэтай сістэме не можа быць хібаў. Магчыма, надакучыла ўсім, што пра мяне заўсёды кажуць - маўляў, Жукоўскага б'юць, Жукоўскага б'юць. Ну і наважылі - апраўдаць адзін раз яго. Але ўсё ж нельга выключаць і чалавечы чыннік: можа, суддзя малады, можа ён штосьці не зразумеў, ці наадварот, яму ўсё абрыдла, ён мерыцца звальняцца і наважыў зрабіць паводле закону. I ён зрабіў паводле закону», - распавёў Жукоўскі.
Жукоўскі нагадаў, што згодна з заканадаўствам толькі штатныя супрацоўнікі СМІ абавязаныя мець акрэдытацыю МЗС Беларусі, а ён супрацоўнічае з «Белсатам» у якасці фрылансера.
Сёлета на Кастуся Жукоўскага міліцыя склала блізу двух дзясяткаў пратаколаў за супрацоўніцтва з тэлеканалам «Белсат» - розныя суды Гомельскай вобласці пакаралі журналіста штрафамі на агульную суму больш за 9 тысяч рублёў.