Падлетка са зламаным хрыбетнікам вярнулі ў Магілёўскую спецвучэльню

Пры гэтым там працуе адзін з тых, хто, са слоў Андрэя Шчаўлікава, збіваў яго.

15 снежня з Магілёўскай абласной лякарні выпісалі Андрэя Шчаўлікава. Нагадаем, што напрыканцы лістапада яго і яшчэ пяцёх хлопцаў збілі супрацоўнікі СПТВ №2. Прычынай сталі ўцёкі хлопцаў з закрытай вучэльні. Кожнага з непаўналетніх збівалі па адным. У выніку ў Андрэя Шчаўлікава дыягнаставалі кампрэсійны пералом першага пазванка. Лекары не змаглі вызначыць, як менавіта хлопец атрымаў траўму - пры ўцёках пасля скачка з чатырохметровай агароджы, альбо пасля збіцця, піша mspring.online.

Выпіска Шчаўлікава павінна была адбыцца а другой гадзіне дня, аднак выпісалі яго раней на пару гадзін. Маці Андрэя Алена ўпэўненая, што гэта было зроблена спецыяльна, каб пазбегнуць увагі СМІ.

З яе слоў, падлетка ў СПТВ №2 ізалявалі ў ахоўным памяшканні пад аховай супрацоўніка вучэльні. Алене паказалі месца, дзе найбліжэйшым часам будзе жыць яе сын, але яна незадаволеная, што не змагла забраць яго дадому:

- Магчыма, калі б удалося падняць шум раней, я б дамаглася таго, каб сына вярнулі на спецрэжым дадому. Я не ведаю, што з ім будзе ў вучэльні.

Неспакой маці выклікае той факт, што ў СПТВ дагэтуль працуе чалавек, якога затрымлівалі ў якасці падазраванага паводле справы аб збіцці - Андрэй Барэйка. Гэтую інфармацыю нам таксама пацвердзілі ў прыёмнай вучэльні.