Як адрозніць камунальнікаў ад аферыстаў

У ЖЭУ распавялі, у якіх сітуацыях беларусы павінны ўпусціць у кватэру камунальнікаў.

У нашы кватэры нярэдка спрабуюць патрапіць прадстаўнікі прыватных кампаній - ад прадаўцоў фільтраў да майстроў у рамонце вокнаў. Часцяком яны называюць сябе камунальнікамі. Як адрозніць работнікаў ЖЭУ ад гандляроў? І ў якіх сітуацыях жыхары павінны ўпусціць у кватэру спецыялістаў абслуговай арганізацыі?

- Скаргі ад жыхароў (1-2 званкі на дзень) на прадаўцоў паслуг, якія пад выглядам работнікаў ЖКГ прапаноўваюць праверку, паступаюць стала, - распавядае tut.by дырэктар ЖЭУ №1 Фрунзенскага раёна Менска Сяргей Левін. - Мы тлумачым, што гэта не нашы работнікі, што нікога ў кватэры не пасылалі, і тлумачым жыхарам, як сябе паводзіць у такіх сітуацыях.

Але не пусціць у кватэру супрацоўніка ЖЭУ, які апрануты ў спецвопратку і паказаў пасведчанне, паводле заканадаўства мы не можам, тлумачаць на партале камунальнай пісьменнасці. Тых, хто адмовіцца падаць доступ да інжынерных камунікацый работнікам камунальнай службы, могуць прыцягнуць да адміністрацыйнай адказнасці, удакладняе начальнік аддзела ў працы са зваротамі грамадзян і СМІ Міністэрства ЖКГ Генадзь Аксціловіч.

- Спажывец павінен разумець, што калі ён адмаўляецца дазволіць доступ у кватэру работніку ЖЭУ, пра візіт якога ён быў папярэджаны загадзя, то яго можна прыцягнуць да адміністрацыйнай адказнасці за парушэнне правілаў карыстання жыллём. Але перш чым упускаць у жыллё незнаёмца, трэба ўдакладніць ягоную асобу і арганізацыю, якую ён прадстаўляе. Як правіла, на гэтым этапе адсяваецца палова «ваконшчыкаў». Гэта элементарная бяспека, - кажа Генадзь Аксціловіч.

У якіх сітуацыях трэба ўпусціць у кватэру работнікаў ЖЭУ, прапісана ў Жыллёвым кодэксе:

- Для зняцця паказанняў з прыбораў індывідуальнага ўліку расходу вады, цеплавой і электрычнай энэргіі і газу;

- Правядзення аварыйнага рамонту, праверкі адпаведнасці жылога памяшкання ўстаноўленым для пражывання санітарным і тэхнічным патрабаванням (у рамках якога работнік ЖЭУ, згодна з зацверджаным графікам, наведвае кватэры для праверкі цэнтральнага ацяплення, інжынерных камунікацый халоднага і гарачага водазабеспячэння, водаадвядзення і сістэм вентыляцыі);

- Пры спыненні надання камунальных паслуг у выпадку іх неаплаты;

- Для выратавання жыцця і прадухілення шкоды здароўю грамадзян і іх маёмасці, а таксама ў выпадках, прадугледжаных заканадаўчымі актамі.

Часцей за ўсё камунальнікам трэба трапіць у кватэру праз планавае абследаванне інжынерных сістэм і камунікацый. Да прыкладу, цэнтральнае ацяпленне і сістэму вентыляцыі спецыялісты правяраюць раз на год.

Камунальнікі як мінімум за дзень павінны папярэдзіць жыхароў аб даце і часе свайго прыходу (папяровае паведамленне на інфармацыйнай дошцы дома), імя і пасады працаўніка. Спецыяліст павінен быць у спецвопратцы, ён абавязаны паказаць дакументы, якія пацвярджаюць дазвол на наданне паслугі ад імя ЖЭУ.

Калі ж на парозе кватэры з'явіцца прадстаўнік прыватнай кампаніі і заявіць пра тое, што ён надае паслугі як падрадчык ЖЭУ, у такіх выпадках трэба праверыць гэтую інфармацыю.

- гэта могуць быць не толькі ЖЭУ, але і прыватныя арганізацыі, якія таксама могуць надаваць паслугі, і ім для праверкі інжынерных камунікацый таксама можа спатрэбіцца доступ у кватэру. Таму калі прадстаўнік абслуговай арганізацыі паведамляе, што надае паслугу як служба, найманая ЖКГ, то гэтую інфармацыю варта праверыць па тэлефоне 115, - удакладняе Генадзь Аксціловіч.