На Клімавіцкім лікёра-гарэлачным заводзе нечакана памянялася ўлада

Стаўленіка Лукашэнкі, які праваліў заданні, наважылі прыбраць «без шуму і пылу».

Усякія навіны, звязаныя з Клімавіцкім лікёра-гарэлачным заводам, выклікаюць асаблівую цікавасць у горадзе Клімавічах, ды і ва ўсёй Магілёўскай вобласці, піша рэгіянальнае выданне 6tv.by.

Справа ў тым, што на ЛВЗ працуе значная колькасць мясцовых жыхароў, а ўнёсак прадпрыемства ў папаўненне абласнога бюджэту досыць значны. Таму інфармацыя аб кадравых зменах у кіраўніцтве завода прыцягнула ўсеагульную ўвагу.

Апошнім кіраўніком ЛГЗ быў Алег Буянаў. У красавіку 2014 года адбылася рабочая паездка Лукашэнкі ў Клімавіцкі раён, падчас якой ён асабіста абвясціў жыхарам Клімавічаў аб тым, што памяняў дырэктара завода. Афіцыйна гэта пацвердзілася 2 траўня, калі прэс-служба дыктатара паведаміла, што Лукашэнка даў згоду на прызначэнне генеральным дырэктарам ААТ «Клімавіцкі лікёра-гарэлачны завод» Алега Аляксеевіча Буянава. Раней ён працаваў старшынём камітэта эканомікі Магілёўскага аблвыканкама.

За некалькі гадоў, якія прайшлі з тых часоў, на ЛВЗ адбыліся сур'ёзныя змены, выкліканыя пагаршэннем яго фінансава-эканамічнага становішча. Штогод адбывалася скарачэнне колькасці працоўных, калектыў прадпрыемства прыкметна зменшыўся. Таксама для зніжэння страт галаўнога прадпрыемства была закрытая частка яго спіртзавод. А ў 2015 годзе Клімавіцкі ЛВЗ ўвялі ў склад рэспубліканскага холдынгу вытворцаў лікёра-гарэлачнай прадукцыі, што адбілася на яго статусе ў прыняцці самастойных рашэнняў.

Нядзіўна, што апошнім часам у Клімавічах неаднаразова казалі аб тым, што гендырэктар ЛГЗ Алег Буянаў хоча пакінуць сваю пасаду. Пра гэта даводзілася чуць, як летась, так і сёлета. Але навіна аб тым, што на завод прыходзіць новы кіраўнік, аднак, стала нечаканай. У сярэдзіне лютага на прадпрыемства прыехаў чалавек, якога прадставілі як будучага дырэктара. Паводле наяўнай у распараджэнні журналістаў інфармацыі, гэта Міхаіл Акулік са Слоніма.

Міхаіл Васільевіч Акулік нарадзіўся ў 1960 годзе. Мае вялікі досвед працы ў алкагольнай галіне Беларусі, блізу 20 гадоў узначальваў Слонімскі вінна-гарэлачны завод. Адзначаны ганаровымі граматамі Беларускага дзяржаўнага канцэрна харчовай прамысловасці «Белдзяржхарчпрам» і Гарадзенскага абласнога выканаўчага камітэта.

Слонімскі вінна-гарэлачны завод спецыялізуецца на вытворчасці пладова-ягадных вінаў, лікёраў дэсертных і каньякоў, розных тыпаў воцату. Тут таксама маюцца праблемы са збытам прадукцыі, адбылося скарачэнне працоўнага калектыву. Калі Слонімскі вінна-гарэлачны завод наважылі далучыць да ААТ «Дзятлаўскі лікёра-гарэлачны завод», Акулік не падтрымаў прапанаваную рэарганізацыю. У студзені 2017 года аб'яднанне ўсе ж адбылося, але ўжо пры іншым кіраўніку. А Міхаіл Акулік прымае цяпер справы на Клімавіцкім лікёра-гарэлачным заводзе.