У Менску пачаўся суд над маньякам з бензапілой

Уладзіслава Казакевіча будуць судзіць паводле некалькіх артыкулаў Крымінальнага кодэкса.

Сёння а 10:00 у Менскім гарадскім судзе пачалося пасяджэнне па аднаму з самых гучных НЗ апошніх гадоў, паведамляе onliner.by.

Абвінавачванні выстаўленыя былому студэнту першага курсу МІПСА Уладзіславу Казакевічу. Пацярпелымі ў справе праходзяць сям'я загінулай Алены Александронец, пакупніца Аксана, якая трапіла ў бальніцу, і работніца гандлёвага цэнтра Ірына, якая спрабавала спыніць хлопца.

Уладзіслава Казакевіча будуць судзіць паводле некалькіх артыкулаў Крымінальнага кодэкса Беларусі: паводле артыкула 14 («Замах на злачынства»), артыкула 13 («Падрыхтоўка да злачынства»), пунктаў 1, 6, 13 і 16 часткі 2 артыкула 139 («Забойства, учыненае з асаблівай жорсткасцю з хуліганскіх памкненняў») і паводле частцы 1 артыкула 339 («Хуліганства»).

Максімальнае пакаранне па названых артыкулах — пазбаўленне волі на тэрмін ад 8 да 25 гадоў, або пажыццёвае зняволенне, або смяротнае пакаранне.

Што адбывалася ў ГЦ «Новая Еўропа»? Версія следства

Следчы камітэт, які завяршыў расследаванне ў крымінальнай справе 29 снежня, падрабязна апісаў карціну таго, што здарылася.

— 8 кастрычніка 2016 года а 17:30 абвінавачваны, знаходзячыся ў стане алкагольнага ап'янення, зайшоў у гандлёвы цэнтр «Новая Еўропа», з чахлом для музычнага інструмента, а таксама заведзенай і гатовай да ўжывання бензапілой, — паведамілі ў СК. — Падлетак выбіраў аб'екты для нападу сярод работнікаў і наведвальнікаў гандлёвага цэнтра. Першай ён паспрабаваў забіць жанчыну, аднак тая змагла хутка зрэагаваць і ўцячы.

Другой жанчыне, 1973 года нараджэння, ён нанёс два ўдары бензапілой.

Пасля таго як бензапіла заглухла праз адзенне пацярпелай, што трапіла ў ланцуг, нападнік дастаў з чахла для гітары сякеру-кувалду і нанёс ёю жанчыне ўдары, ад якіх яна памерла на месцы здарэння.

Затым абвінавачваны, працягваючы перамяшчацца па гандлёвым цэнтры, прычыніў цялесныя пашкоджанні рознай ступені цяжару двум жанчынам.

Праз непрацяглы час ён быў затрыманы работнікамі і наведвальнікамі гандлёвага цэнтра, а таксама супрацоўнікамі міліцыі, што дазволіла прадухіліць далейшыя ахвяры.

Якія ў хлопца маглі быць матывы і прычыны?

— Ён нападаў на жанчын, якія не маглі аказаць супраціў. Прычына? Калі цытаваць яго паказанні даслоўна: «Хацеў пасекчы людзей. Злосць на самога сябе». Кажа, што яго раздражняла вялікая колькасць людзей, была злосць на самога сябе і наогул усё. Такім чынам ён наважыў выплюхнуць з сябе гэтую злосць, — казаў на брыфінгу 9 кастрычніка першы намеснік старшыні СК Беларусі Аляксей Волкаў.

Як высветліла следства ўжо пазней, 7-га чысла хлопец першапачаткова збіраўся прыйсці ў свой універсітэт.

— Непаўналетні, знаходзячыся ў стане алкагольнага ап'янення, зайшоў у навучальны корпус і завёў бензапілу. Далей ён меў намер зайсці з ёй і сякерай-кувалдай у лекцыйную аўдыторыю, у якой у гэты час праходзілі заняткі ў 178 студэнтаў, з мэтай нападу на іх, — адзначалі следчыя. — Давесці свой намер да канца непаўнагадовы не змог, бо выпадкова закрануў рычаг тормазу бензапілы, у выніку чаго адбылося спыненне ланцуга. Спробы завесці бензапілу былі няўдалымі, што вымусіла яго пакінуць тэрыторыю навучальнай установы.

Што з псіхікай абвінавачанага?

— Паводле заключэння стацыянарнай комплекснай псіхолага-псіхіятрычнай экспертызы, непаўнагадовы ў перыяд інкрымінаваных яму дзеяў мог у поўнай меры ўсведамляць значэнне сваіх дзеянняў і кіраваць імі, — адзначылі ў СК.

Пры гэтым сям'я хлопца спасылаецца на тое, што Уладзіслаў прымаў спецыяльны прэпарат ад вугроў, які і мог справакаваць такія паводзіны іх сына.