Віцебскі школьнік перамог у міжнароднай алімпіядзе ў інфарматыцы
4- 28.02.2017, 12:51
- 27,227
У чатырох з пяці заданняў ён набраў 100 балаў са 100 магчымых.
На выходных прайшла Адкрытая алімпіяда Універсітэта Інаполіс для школьнікаў у інфарматыцы. Пераможцам стаў 11-класнік з Віцебска Артур Петухоўскі, пацвердзілі tut.by арганізатары спаборніцтва.
У алімпіядзе ўдзельнічалі прадстаўнікі 12 краін і 21 рэгіёна Расеі. Спаборніцтвы прайшлі на дзвюх пляцоўках: у Універсітэце Інаполіс (Расея) і ў Кампутарнай акадэміі «ШАГ» (Менск).
У алімпіядзе бралі ўдзел вучні 7-11 класаў, якія прайшлі завочны адборачны этап. У адборы спаборнічалі 3374 школьнікі з 56 краін.
Школьнікі рашалі класічныя алімпіядныя задачы. Артур Петухоўскі з віцебскай Гімназіі №8 набраў самую вялікую колькасць балаў сярод астатніх удзельнікаў — 457. У чатырох з пяці заданняў ён набраў 100 балаў са 100 магчымых.
Афіцыйна пераможцамі алімпіяды з’яўляюцца сем удзельнікаў, 18 — прызёрамі другой ступені, 33 — прызёрамі трэцяй ступені. Сярод прызёраў былі школьнікі з Паўднёвай Карэі, Украіны, Казахстана, Вугоршчыны, Польшчы, Рэспублікі Беларусь і Расеі.
Пераможцы спаборніцтва змогуць паступіць у расейскія ВНУ без уступных выпрабаванняў. Вынікі алімпіяды пры паступленні могуць быць залічаны як максімальны бал за АДЭ па інфарматыцы.