Не зважаючы на крызіс, улады прадаўжаюць будаўніцтва жылля ў Венесуэле
10- 28.02.2017, 16:23
- 19,236
Раней шматлікія беларускія будаўнікі былі вымушаныя вяртацца на радзіму.
Беларусь і Венесуэла разгледзелі перспектывы супольнай рэалізацыі праектаў у сферы будаўніцтва жылля. Гэтай тэме была прысвечаная сустрэча пасла Беларусі ў Венесуэле Алега Паферава з міністрам жылога асяроддзя і жылля Венесуэлы Мануэлем Кеведа, гаворыцца ў прэс-рэлізе МЗС Беларусі, піша tut.by.
«Алег Пафераў пацвердзіў гатоўнасць беларускага боку прадаўжаць удзел беларускіх будаўнікоў ва ўзвядзенні сацыяльнага жылля ў Венесуэле», - гаворыцца ў паведамленні.
Будаўніцтвам жылля ў Венесуэле займаецца кампанія «Белзамежбуд» (акцыянеры: «Альма Інвестментс ФЗЕ» (ААЭ), беларускі Банк «Пастанова», берасцейскі «Будаўнічы трэст №8» і «Гомельпрамбуд»). Узначальвае раду дырэктараў кампаніі вядомы бізнэсовец Віктар Шаўцоў.
Улетку 2016 года прэзідэнт Венесуэлы Нікалас Мадура ўзяў удзел у цырымоніі здачы 288 кватэр у васьмі дамах, якія будавала ў Каракасе беларуская кампанія. Жыллё гэта сацыяльнае, пабудаванае ў рамках венесуэльскай праграмы «Вялікая Місія жыллё». Усяго на той момант «Белзамежбуд» здаў заказчыку 7256 кватэр з 10 тысяч, якія плануюць пабудаваць.
Эканамічны крызіс у Венесуэле адбіўся і на будаўнічай галіны. Тэмпы работ знізіліся. Многія беларускія будаўнікі былі вымушаныя вярнуцца на радзіму.