Мікалай Статкевіч узначаліць акцыю 25 сакавіка
113- 13.03.2017, 16:33
- 53,597
Марш абураных беларусаў пройдзе ў Менску ў Дзень Волі.
З такой заявай сёння выступіла Рада Беларускага Нацыянальнага Кангрэсу.
Прыводзім тэкст заявы:
«17 лютага ўдзельнікі «Марша абураных беларусаў» прынялі патрабаванні народа да правячага рэжыму. Былі абраныя народныя прадстаўнікі, якія накіравалі патрабаванні Марша дыктатару і заявілі пра гатоўнасць весці перамовы аб выкананні гэтых патрабаванняў.
Марш 17 лютага стаў сігналам для масавых народных выступаў у падтрымку яго патрабаванняў ва ўсёй краіне. Але рэжым адмаўляецца ісці насустрач народу. Ён толькі часова прыпыніў дзеянне дэкрэта №3. Ніякіх іншых крокаў, якія б палегчылі цяжкае матэрыяльнае становішча людзей, не зроблена. Таксама рэжымам праігнараванае народнае патрабаванне сапраўдных выбараў. Замест гэтага пачаліся рэпрэсіі супраць актывістаў дэмакратычнай апазіцыі.
Таму, выконваючы волю народа, выказаную 17 лютага ў Менску і на наступных пратэстах ва ўсіх буйных гарадах Беларусі, БНК заяўляе аб правядзенні 25 сакавіка ў Менску «Марша абураных беларусаў-2». Марш пачнецца а 14:00 ад Акадэміі Навук.
Каб забяспечыць арганізаванае і мірнае правядзенне Марша, мы даручаем кіраванне ім сябру Рады БНК Мікалаю Статкевічу. Яму таксама даручана напярэдадні Марша публічна агучыць яго план.
Мы заклікаем грамадзян усёй Беларусі ўзяць удзел у Маршы і выказаць волю народа нахабнай уладзе.
Мы прапануем дыктатару самому выканаць даручэнне, дадзенае ім сваім чыноўнікам і сустрэцца з удзельнікамі Марша.
Мы запрашаем замежных палітыкаў, журналістаў і дыпламатаў скарыстацца бязвізавым рэжымам і ўзяць удзел у маршы.
Мы звяртаемся да жыхароў усіх буйных гарадоў Беларусі. 26 сакавіка падтрымайце пратэст у сталіцы - выйдзіце а 12.00 на галоўныя плошчы сваіх гарадоў на Маршы абураных беларусаў.
Беларусы, годзе баяцца. Пара браць лёс краіны ў свае рукі.
Улада - народу!
Жыве Беларусь!»