Расея настойліва заваблівае беларускія нафтапрадукты ў свае парты

«Расейская чыгунка» павялічыла з 25% да 50% зніжку на перавозкі нафтапрадуктаў са станцый Барбароў і Наваполацк у напрамку Паўночнага Захаду РФ.

Інфармацыя пра гэта апублікаваная на сайце РЧ.

«Зацвердзіць унясенне змяненняў (.) У дачыненні карэктавання каэфіцыента 0,75 на 0,50 да тарыфаў на перавозкі нафтапрадуктаў (...) у цыстэрнах са станцыі Барбароў і Наваполацк Беларускай чыгункі ў напрамку партовых станцый Кастрычніцкай чыгункі», гаворыцца ў паведамленні.

Каэфіцыент уступіць у сілу «ва ўстаноўленым парадку» (праз 10 дзён пасля афіцыйнай публікацыі ў друкаваным выданні РЧ) і будзе дзейнічаць да змены цяперашніх коштавых межаў. Манаполія вызначыла каэфіцыент у межах «тарыфнага калідора», у рамках якога можа вар'іраваць зацверджаныя дзяржавай стаўкі, адзначае tut.by.

Блізу станцыі Барбароў знаходзіцца Мазырскі нафтаперапрацоўчы завод (ва ўрада Беларусі – 42,76% акцый, у расейскай «Слаўнафты», падкантрольнай «Раснафце» і «Газпрам нафце» – 42,58%), паблізу станцыі Наваполацк – «Нафтан».

Пастанова пра 25%-ую зніжку на перавозкі бензіну, дызельнага паліва і мазуту з дзвюх беларускіх станцый у парты Паўночнага Захаду РФ у перыяд да 2019 г. «Расейская чыгунка» прыняла ў кастрычніку 2016 года. Праўда, у снежні прэзідэнт РЖД Алег Белазёраў заявіў, што кампанія гатовая павялічваць памер паніжальнага каэфіцыенту. «У нас была зніжка 25% у беларускім кірунку, дадзеная для пераключэння грузаў у парты Расейскай Федэрацыі, на паўночны захад. Калі спатрэбіцца, мы дамо дадатковыя зніжкі для таго, каб грузы ехалі па чыгунцы не ў Прыбалтыку, а на паўночны захад за кошт таго, што ў нас ёсць такая эканоміка», – сказаў Белазёраў.

Ужо даўно асноўны транзіт беларускіх нафтапрадуктаў ажыццяўляецца праз парты Літвы і Латвіі ў сілу геаграфічнай блізкасці. Расейскі бок мяркуе, што зніжэнне тарыфаў стымулюе пераклад нафтавых грузаў з прыбалтыйскіх партоў у парты РФ. Улады Расеі прынялі пастанову да 2018 года спыніць экспарт нафтапрадуктаў праз парты Клайпеды (Літва), Вентспілса і Рыгі (Латвія), загрузіўшы свае ўласныя магутнасці на Балтыйскім моры (Усць-Луга, Прыморск і Новарасійск).

Але краіны Балтыі таксама не сядзяць склаўшы рукі. Сярод іншага, у пачатку гэтага года ў Менску было адкрытае пастаяннае прадстаўніцтва Латвійскай чыгункі, каб «спрыяць супрацоўніцтву ў галіне чыгуначных перавозак і ўмацаваць супрацоўніцтва ў сферы транзіту і лагістыкі». Кіраўніком прадстаўніцтва ЛЧ у Менску стала Уна Вітола, папярэдняя прадстаўніца Міністэрства паведамлення Латвіі ў Расеі. У 2016 годзе па чыгунцы з Беларусі ў Латвію было перавезена 15,6 млн тонаў грузаў (у тым ліку 5,4 млн тонаў нафтапрадуктаў, што склала 79% усіх нафтаналіўных грузаў, перавезеных па латвійскім рэйках).