Акцыя ў Варшаве: Беларусь будзе вольнай!
2- 25.03.2017, 18:48
- 18,171
25 сакавіка сотні беларусаў правялі ў Варшаве Марш салідарнасці з нагоды Дня Волі.
Мітынг пачаўся ля помніка Тадэвушу Касцюшку. Перад прысутнымі выступілі старшыня камісіі Сейма Польшчы ў справах Беларусі Роберт Тышкевіч, судырэктар Беларускага дома ў Варшаве Алесь Зарэмбюк, былы палітвязень Уладзімір Кобец, чалец аргкамітэта для стварэння прафзвязу прадпрымальнікаў «Салідарнасць» Алесь Макаеў і іншыя.
Алесь Зарэмбюк выказаў салідарнасць адважным беларусам, якія сёння выйшлі на святкаванне Дня Волі ў Менску і былі брутальна разагнаныя і затрыманыя.
- Віншую ўсіх з Днём Волі і Днём Незалежнасці! 99-ю гадавіну Беларускай Народнай Рэспублікі мы святкуем разам у Варшаве, а ў Менску ў гэты час нашых братоў, сясцёр, і сваякоў арыштоўваюць і запалохваюць, не выпускаюць з пад'ездаў, не даюць ім выказаць сваю волю і веру ў тое, што Беларусь жыла, жыве і будзе жыць.
Сёння мы сабраліся ў Варшаве, каб не толькі ўрачыста адсвяткаваць 99-ю гадавіну абвяшчэння Беларускай Народнай Рэспублікі, але і выказаць сваю салідарнасць і падтрымку ўсім тым, хто цяпер у Менску выказвае свой пратэст, праводзіць сваё святкаванне нашай незалежнасці.
Мы падтрымліваем усіх, хто цяпер знаходзіцца ў турмах - а гэта сотні чалавек. Мы падтрымліваем усіх студэнтаў, якіх выключаюць з універсітэтаў у гэтыя дні. Мы просім падтрымкі ў Захаду, Польшчы, ЕЗ у гэтыя сумныя, на жаль, вельмі сумныя і брутальныя часы, якія цяпер адбываюцца ў Менску. Са святам, з Днём Волі! Будзем салідарнымі! Жыве Беларусь!
Старшыня камісіі Сейма Польшчы ў справах Беларусі Роберт Тышкевіч заявіў, што Беларусь можа разлічваць на падтрымку Польшчы.
- Сёння для нас вельмі важны дзень. Вы, браты, маеце такое ж права быць у свабоднай і дэмакратычнай Еўропе. І ў Менску сёння адбываюцца падзеі, якіх у Еўропе не павінна быць. Годзе гэтай тыраніі. У вас ёсць права быць такімі, як мы, палякі, свабоднымі і незалежнымі.
Мы салідарныя з вамі і наш парламент заўсёды будзе вашым домам, пакуль у вас у Менску не з'явіцца свой свабодны парламент і пакуль не будзе дэмакратыі ў Беларусі. Мы з вамі кажам: Досыць! Жыве Беларусь!
Пасля выступаў каля помніка Касцюшку шэсце прайшло праз цэнтр Варшавы да помніка Адаму Міцкевічу, дзе адбыўся другі мітынг.
Пасля сканчэння мітынгу Роберт Тышкевіч распавёў пра тое бязмежжа, якое адбывалася ў гэты час у Менску, а таксама нагадаў, што без Беларусі не будзе адзінай Еўропы.
- Дарагія сябры, да нас прыходзяць сумныя навіны з Беларусі аб чарговых пераследах і брутальных арыштах. Мы павінны быць салідарныя. Гэта натуральная рэакцыя свабодных людзей на рэпрэсіі і пераслед. Пад помнікам Міцкевічу я хачу вас запэўніць: палякі заўсёды будуць з беларусамі ў гэтыя цяжкія хвіліны.
Месца Беларусі павінна быць у Еўропе. Пра гэта пісаў і казаў наш агульны герой Адам Міцкевіч. І гэтай Еўропы не можа быць без краіны, дзе ён нарадзіўся, без Беларусі. Разам мы зможам даць Беларусі еўрапейскія перспектывы, - заявіў Тышкевіч.
У канцы мітынгу людзі праспявалі духоўны гімн беларусаў «Магутны Божа».
Вечарам у Беларускім доме ў Варшаве пройдзе канцэрт Касі Камоцкай.