Літоўскія дэпутаты: У беларускім грамадстве адбываецца пераварот

У Літве выказалі падтрымку пратэстоўцам у нашай краіны.

У Беларусі ў суботу, 25 сакавіка, прайшлі пратэсты супраць рэжыму Лукашэнкі. У Менску ўлады ўжылі грубую сілу супраць удзельнікаў пратэсту, мінакоў і журналістаў. Віленскія дэпутаты заклікаюць забяспечыць у Менску і іншых беларускіх гарадах свабоду сходаў, піша delfi.lt.

Парламенцкая група «За дэмакратычную Беларусь» і Саюз айчыны-Хрысціянскія дэмакраты Літвы ў Вільні правялі пікет ля амбасады Беларусі ў Вільні.

Кансерватар Лаўрынас Кашчунас сказаў, што так хочуць заклікаць Лукашэнку паважаць права сходаў і свабоды слова.

«Наша думка вельмі зразумелая - у нас ёсць звесткі, што сёння ў Беларусі могуць быць рэпрэсіі, могуць ужыць гвалт супраць мірных жыхароў, супраць іх мірнага жадання выказаць сваё меркаванне. Нарэшце, могуць з'явіцца новыя палітычныя зняволеныя. Мы хочам паслаць вестку, каб Лукашэнка паважаў свабоду слова, сходаў і іншыя фундаментальныя правы. Мы таксама зразумела кажам, што нам патрэбная самастойная Беларусь, але без моцнай нацыянальнай самасвядомасці і моцнага грамадзянскага грамадства гэта немагчыма», - сказаў Кашчунас.

Дэпутат запэўніў, што Лукашэнка спрабуе апраўдаць свой рэжым, кажучы аб суверэнітэце краіны. Але відавочна, што Беларусь мае патрэбу ў рэформах, бо людзі ўсё часцей выходзяць на вуліцы. Раней у Беларусі пратэставала ў асноўным апазіцыя і прыхільнікі дэмакратыі, але ў суботу на вуліцы выйшлі працоўныя, абураныя падаткам «на дармаедства».

«Гэта толькі міф, так спрабуюць апраўдаць рэжым, кажучы, што гэта нейкая гарантыя суверэнітэту. Ён гандляваў гэтым суверэнітэтам толькі для таго, каб захаваць стабільнасць рэжыму, а цяпер мы бачым выразную тэндэнцыю, што гэтая стабільнасць, сацыяльны кантракт з грамадствам страчвае сілу і мадэль планавай эканомікі не дзейнічае, і людзі, якія раней не пратэставалі, выходзяць на вуліцы», - сказаў дэпутат.

Паводле ягоных слоў, нягледзячы на тое, што грамадзянская супольнасць у Беларусі не такая моцная, як ва Украіне, адчуваецца, што яна становіцца больш вольнай. «Сёння гэтыя працэсы, гэтыя новыя людзі і пласты ўжо дазваляюць гаварыць аб тым, што ў грамадстве адбываецца пераварот. Новы этап развіцця, грамадства становіцца больш вольным, атрымлівае новы патэнцыял, а для Лукашэнкі гэта сапраўдны галаўны боль», - сказаў Кашчунас.