Праваабаронцы: У Менску затрымалі і збілі брытанскага журналіста
41- 26.03.2017, 10:46
- 57,306
Брытанскага журналіста закавалі ў кайданкі і білі па твары ў РАУС пасля Дня Волі ў Менску.
25 сакавіка ў Менску каля плошчы Перамогі падчас разгону акцыі ў Дзень Волі быў затрыманы разам з многімі мітынгоўцамі і брытанскі журналіст Філіп Ворвік, паведамляе сайт spring96.org.
Пазней ён напісаў, што АМАПаўцы закавалі яго ў кайданкі, не дазвалялі звязацца з пасольствам, білі па твары.
Больш за 6 гадзін Ворвік правёў у РУУС. Цяпер, паводле інфармацыі назіральнікаў, ён на свабодзе.
Ворвік - фатограф і радыёжурналіст, які працуе на ангельскую службу Міжнароднага французскага радыё, радыёстанцыі «Немецкая волна» і іншыя СМІ.
Нагадаем, што 25 сакавіка ўлады выставілі супраць мірных дэманстрантаў тысячы супрацоўнікаў АМАПа.