Жыццё Статкевіча пад пагрозай!
36- Уладзімір Някляеў
- 26.03.2017, 15:06
- 49,430
Паэт Уладзімір Някляеў патрабуе ад улады неадкладна паведаміць, дзе знаходзіцца лідар БНК.
Сябра Рады Беларускага Нацыянальнага Кангрэсу Уладзімір Някляеў, які цяпер знаходзіцца ў шпіталі, звязаўся з Charter97.org і зрабіў заяву пра лёс зніклага палітыка Мікалая Статкевіча.
«Свабоду Мікалаю Статкевічу! Волю ўсім затрыманым на Дзень Волі!
Больш як тры дні ніхто не ведае, дзе знаходзіцца Мікалай Статкевіч. Што з ім? Наогул ці жывы ён? Практыка, якую выкарыстоўвае ў дачыненні да яго ўлада - гэта дзяржаўны бандытызм. Такімі прыёмамі карыстаецца дыктатарскі, злачынны рэжым.
Упэўнены, што ў дачыненні да Статкевіча фабрыкуецца крымінальная справа. Заяўляю гэта зыходзячы з таго, што адбывалася мінулай ноччу са мной. Сярод маіх папер знайшлі дакумент на польскай мове і паспрабавалі падаць яго як нешта, што можа чыніць шкоду нацыянальнай бяспецы Беларусі.
Я патрабую неадкладнага вызвалення Статкевіча. Патрабую неадкладнага паведаміць ягонай сям'і аб тым, дзе ён знаходзіцца. Патрабую ад уладаў (ведаючы, як цяжка давялося маёй жонцы, маім дзецям у 2010 годзе) паведаміць: жывы чалавек ці яго забілі.
Сем'ям нават тых нелюдзяў, якія так паступаюць сёння са Статкевічам, я не зычу такое выпрабаваць.
Свабоду Статкевічу! Свабоду палітвязням!»