Суд прысудзіў прэзідэнта да смяротнага пакарання
20- 26.03.2017, 15:21
- 74,286
Суд Емена прысудзіў да вышэйшай меры пакарання таксама шэсць высокапастаўленых чыноўнікаў ва ўрадзе.
У Емене суд прыгаварыў прэзідэнта Абд Рабу Мансура Хадзі да смяротнага пакарання.
Паводле звестак агенцтва Рэйтэр (пераклад - ria.ru), Хадзі быў прыгавораны да пакарання смерцю за "дзяржаўную здраду" і "спрыянне краіне-агрэсару Саудаўскай Арабіі ды яе хаўруснікам". Апроч яго, суд Саны прысудзіў да вышэйшай меры пакарання яшчэ шэсць высокапастаўленых чыноўнікаў у яго ўрадзе, у тым ліку пасла Емена ў ЗША Ахмеда Авада Бін Мубарака і былога міністра замежных спраў краіны Рыяда Ясіна.
У Емене з 2014 года доўжыцца ўзброены канфлікт, у якім з аднаго боку ўдзельнічаюць паўстанцы-хусіты з шыіцкага руху "Ансар Ала" і лаяльная экс-прэзідэнту Алі Абдалу Салеху частка войска, а з другога - урадавыя войскі і байцы, лаяльныя прэзідэнту Абд Рабу Мансуру Хадзі. Урад з паветра і на зямлі атрымлівае падтрымку арабскай кааліцыі на чале з Саудаўскай Арабіяй.