Дзе купляюць ежу жыхары беларускіх рэгіёнаў

Хто з'яўляецца галоўным канкурэнтам «Еўрагандаль» у рэгіёнах.

«Еўрагандаль» становіцца найбуйнейшым гульцом на рэгіянальных рынках, выцясняючы крамы Белкаапсаюза і невялікіх прыватных кампаній, піша zautra.by.

З пачатку года Міністэрства антыманапольнага рэгулявання і гандлю (МАРГ) выявіла «дамінуючае становішча» «Еўрагандаль» у раздробным гандлі харчовымі таварамі адразу ў дзевяці раёнах Беларусі.

З 2014 года, калі гэтая сетка трапіла ў поле зроку антыманапольных органаў, «Еўрагандаль» праходзіць у якасці дамінанта ў гандлі ўжо ў 16 рэгіёнах. Яшчэ ў адным – Слаўгарадскім – «дамінуючым» суб'ектам з'яўляецца яго даччыная структура «Дабраном».

Паводле звестак дзяржаўных рэестраў гаспадарчых суб'ектаў, якія займаюць дамінуючае становішча на таварных рынках, з гэтага года «Еўрагандаль» прысутнічае ў рэестрах усіх абласцей.

Трапленне ў рэестр азначае пастаянны дзяржкантроль за дзейнасцю яго фігуранта і выпрацоўку і ажыццяўленне мер па папярэджанні, абмежаванні і спыненні манапалістычнай дзейнасці.

У пэўных выпадках антыманапольны орган «мае права ў мэтах развіцця канкурэнцыі прыняць пастанову аб прымусовай рэарганізацыі гаспадарчага суб'екта, які займае дамінуючае становішча на таварным рынку».

Таксама ў мэтах развіцця таварных рынкаў і канкурэнцыі антыманапольны орган можа накіраваць у адпаведныя дзяржаўныя органы і гаспадарчым суб'ектам прапановы аб змене коштавай палітыкі.

Упершыню «Еўрагандаль» трапіў у рэестры дамінантаў у чэрвені 2014 годзе. На загад Мінэканомікі, якая ажыццяўляла тады антыманапольны кантроль, рытэйлер быў прызнаны дамінуючай структурай на тэрыторыі Горак і Горацкага раёна.

У 2015 годзе ў поле зроку антыманапольнікі трапіла дзейнасць кампаніі ў Браслаўскім (Віцебская вобласць), Жабінкаўскім (Берасцейская вобласць), Кіраўскім (Магілёўская вобласць) і Уздзенскім і Старадарожскім (Менская вобласць) раёнах. Тады ж у рэестр дамінантаў на раздробных рынках двух раёнаў Магілёўскай вобласці (Слаўгарадскі і Чэрыкаўскі) была ўключана даччыная структура «Еўрагандаль» — «Дабраном» (у 2017 годзе чэрыкаўскі «Дабраном» выключаны з яго).

На пачатку 2017 года МАРГ зноў звярнуўся да праблемы канкурэнцыі ў раздробным гандлі ў рэгіёнах Беларусі. На працягу сакавіка-красавіка міністэрства ўзяло пад кантроль дзейнасць «Еўрагандаль» яшчэ ў дзевяці раёнах краіны. Рэестр манапалістаў Магілёўскай вобласці папоўніўся падраздзяленнем кампаніі ў Круглянскім раёне, Менскай – у Мядзельскім. Упершыню «Еўрагандаль» быў уключаны ў рэестры Гарадзенскай (па Мастоўскаму і Свіслацкаму раёнах) і Гомельскай (па Веткаўскаму, Хойніцкаму, Ельскаму, Жыткавіцкаму і Лельчыцкаму раёнаў) абласцей.

На пачатку красавіка гэтага года міністр антыманапольнага рэгулявання і гандлю Уладзімір Калтовіч заявіў, што ведамства можа ўпершыню прымяніць санкцыі ў дачыненні да «Еўрагандаль». З ягоных слоў, міністэрства вымушана рэагаваць на тое, што ў сямі раёнах рытэйлер забраў пад свой кантроль больш за 20% дапушчальнага паводле заканадаўству рынку.

«Еўрагандаль» у афіцыйным каментары прызнаў, што перавысіў дапушчальныя 20% у аб'ёме раздробнага абароту харчовымі таварамі ў некаторых рэгіёнах, але не ўважаюць гэта парушэннем.

«Сапраўды, на сённяшні дзень у адпаведнасці з атрыманымі нашай кампаніяй апавяшчэннямі Міністэрства антыманапольнага рэгулявання і гандлю доля ТАА «Еўрагандаль» у аб'ёме раздробнага тавараабароту харчовых тавараў у некаторых рэгіёнах за 2015 год перавысіла ўсталяванае заканадаўствам абмежаванне 20%», — заявілі ў кампаніі.

Але, як адзначылі ў «Еўрагандалі», сам факт перавышэння гэтай долі не з'яўляецца парушэннем дзейнага заканадаўства.

«Парушэнне мела б месца ў тым выпадку, калі б пасля афіцыйнай публікацыі звестак харчовага раздробнага тавараабароту ў рэгіёнах ТАА «Еўрагандаль» у якім-небудзь рэгіёне меў бы долю большую за 20% і працягваў бы адкрываць там новыя харчовыя крамы», — падкрэсліваецца ў афіцыйным каментары кампаніі.

Аналагічнага кантролю праз уключэнне ў рэестр дамінантаў падвяргаецца з 2010-х гадоў дзейнасць асноўнага канкурэнта «Еўрагандаль» у рэгіёнах – прадпрыемстваў Белкаапсаюза. Раённыя спажыўтаварыствы фігуруюць у рэестрах усіх абласцей, у некаторых рэгіёнах спаборнічаюць на рынках з «Еўрагандлем».

На раздробным рынку Наваполацка ў разрад дамінантаў з 2015 года ўключанае камунальнае прадпрыемства «Базіс-Наваполацк» і прыватная кампанія «Рэсттрэйд».