Менскі таксіст-хапуга за паездку на 11 км узяў 41 рубель

Таксіст надумаў зарабіць на дзяўчыне з Латвіі.

У рэдакцыю Onliner.by патэлефанавала дзяўчына Марыя. Яна распавяла, што ўчора ўвечары разам з сяброўкай скарысталіся паслугамі таксі ў Менску. Усе ведаюць, што браць аўто «ад борта» рызыкоўна, але бываюць абставіны, калі ехаць трэба тэрмінова, без доўгіх роздумаў.

— Ведаеце, я не хачу нікому рабіць непрыемнасці і скардзіцца таксама не хачу. Выдатна разумею, што няма на каго наракаць — вінаватыя самі. Але за дзяржаву крыўдна, — пачала гаварыць Марыя.

А рэч вось у чым. Да яе ў госці прыехала сяброўка з Латвіі. Дзяўчаты былі ў гандлёвым цэнтры «Замак» на праспекце Пераможцаў, але нечакана ў Марыі пагоршылася самаадчуванне. Надумалі тэрмінова ехаць «дадому»: выйшлі на вуліцу і селі ў таксі — Ford Mondeo, цёмнага колеру. Кіроўца - малады ветлівы мужчына.

— Ад «Замка» мы адправіліся на вуліцу Маякоўскага, дзе я выйшла, а сяброўка паехала ў свой гатэль недалёка ад гандлёвага дома «На Нямізе». Пра тое, што адбывалася далей, я ведаю ад яе, — распавяла нашая чытачка.

У канцы паездкі таксіст выставіў рахунак — 41 рубель. Паводле чэку, за 21 хвіліну шляху аўто праехала блізу 11 км.

— Мая сяброўка, вядома, такіх расцэнак не чакала. Наадварот, усяляк хваліла нашую краіну, гаварыла пра парадак і прыстойнасць, і раптам такое, — адзначыла Марыя. — Мы ж разам ехалі, гаварылі пра ўсё гэта, яна распавядала пра Юрмалу — таксіст усё гэта чуў. Няўжо надумаў зарабіць на замежніцы?

Са слоў чытачкі, у аўто яна не ўбачыла інфармацыі пра дзейныя тарыфы.

— Калі сяброўка запатрабавала паказаць ёй тарыфы, кіроўца дастаў інфармацыйную шыльду з шуфляды. Там усё было паказана па-расейску. А як быць замежнікам, якія не ведаюць мовы? Ці яны не карыстаюцца таксі? — пытаецца суразмоўца.

Дзяўчына аплаціла паездку, хоць пазітыўных уражанняў пра Беларусь ёй гэта не прынесла.

— Кіроўца, да ўсяго іншага, не жадаў прымаць да аплаты картку, казаў, што лепш разлічыцца гатоўкай. Але, атрымаўшы адмову, нарэшце дастаў аплатны тэрмінал, — дадала Марыя.

Гэта далёка не першая скарга на расцэнкі таксістаў, якія прымаюць замовы «ад борта». Пасажырам важна памятаць, што ў такім выпадку індывідуальны прадпрымальнік сам устанаўлівае тарыфы, паводле якіх выконвае паслугі. Яны могуць быць істотна вышэйшымі за тыя расцэнкі, якія звычайна дзейнічаюць на паездкі ў горадзе. Значна надзейней замаўляць аўто праз аператара службы таксі альбо мабільны дадатак.