«Нас абрабавалі»: У цэнтры Менска прайшоў шматлюдны пікет

Акцыю пратэсту правялі дольшчыкі будаўніцтва менскага гандлёвага цэнтра «Імпульс-2».

Раніцай 30 красавіка больш за 30 чалавек сабралася ля будынка ГЦ «Імпульс-2» у цэнтры сталіцы. Дольшчыкі, якія ўдзельнічалі ў будаўніцтве будынка, якое прадалі новаму ўласніку, прыйшлі з плакатам «Нас абрабавалі і выкінулі на вуліцу», паведамляе tut.by.

— Мы будавалі за свой кошт будынак, а яго 27 красавіка прадалі кампаніі, якую ўзначальвае сябар Лукашэнкі. Нас абрабавалі. Пры гэтым нашу праблему можна вырашыць адным званком — ад Лукашэнкі, — кажа адзін з дольшчыкаў, Аляксандр. — Чаму б нам не аддаць тое, што мы будавалі, а астатнюю частку будынка хай прадае сваім сябрам. Як маглі прадаць наша?!

— Мы сабраліся, каб атрымаць хоць нейкі народны рэзананс. Лукашэнка нас не чуе, чыноўнікі не чуюць. Не звяртаюць на нас увагі. Ды што там — яны смяюцца з нас, — кажуць дольшчыкі.

— На нашым прыкладзе можна бачыць, як небяспечна інвеставаць у Беларусь. У любы момант укладзенае могуць адабраць. Мы будавалі гэты будынак як інвестыцыіны, укладвалі ў будучыню нашых сем'яў. Цяпер 160 сем'яў засталіся без сваіх укладанняў.

Частка дольшчыкаў сапраўды прыйшла з дзецьмі.

Мінакі мала цікавіліся тым, што адбываецца. Людзі сярэдніх гадоў, праходзячы міма, паскараць і нават не глядзелі на надпіс. Моладзь запавольвала крокі, чытала, але не спынялася і дадатковых пытанняў не задавала. Пажылыя ўдакладнялі ў журналістаў, хто і як абрабаваў.

Дольшчыкі падпісалі чарговы зварот у адміністрацыю Лукашэнкі з патрабаваннем звярнуць увагу на іх праблему. Людзі прастаялі каля гадзіны, да іх падышлі міліцыянты ў цывільным: угаворвалі разысціся. Каля 12 гадзін акцыя скончылася, людзі сталі разыходзіцца. Абышлося без затрыманняў.

Скандалы з «Імпульсам-2», у якім 180 прадпрымальнікаў пабудавалі дарагія памяшканні, не сціхаюць ужо некалькі гадоў. Людзям увесь гэты час казалі: пабудаванае вам ужо не аддадуць, ідзіце ў суд, забірайце грошы. Дольшчыкі не верылі. Але нядаўна гаспадаром будынка, які яны пабудавалі, стала кампанія «Магнат Трэйд».

Як вынікае з распараджэння Лукашэнкі, аб'ект перайшоў кампаніі з растэрміноўкай аплаты да 3 гадоў. З дольшчыкамі таксама мяркуецца разлічыцца за тры гады — сумы, якія ім належаць, павінны быць устаноўлены ў судовым парадку. Нагадаем, тыя, хто звяртаўся ў суды, прайшлі першыя інстанцыі і не змаглі даводзіць, што іх дамовы з кампаніяй, якая будавала «Імпульс-2», сапраўдныя.

Большая частка дольшчыкаў у суды не звярталася. А сёння яны прыйшлі да «Імпульсу».