Як быкі на чырвоную анучу: У цэнтры Баранавічаў міліцыя кідалася на лісткі паперы
33- 1.05.2017, 15:59
- 23,321
Баранавіцкія «вартавыя парадку» здзівілі сваёй неадэкватнасцю.
Больш за дзесяць актывістаў выйшлі 1 траўня на плошчу Леніна ў Баранавічах.
Людзі, якія сабраліся, планавалі ўзяць у рукі чыстыя аркушы паперы.
На плошчы ў гэты час дзяжурыла вельмі шмат міліцыі як у форме, так і ў цывільным.
- Мы выйшлі на знак салідарнасці з працаўнікамі, правы якіх сёння парушаюцца, а заробак не адпавядае ўзроўню жыцця, - распавёў Intex-press адзін з удзельнікаў акцыі. - Мы хочам прыцягнуць увагу да гэтых праблем як гараджан, так і нашай улады.
Таксама адным з патрабаванняў пратэстоўцаў было правядзенне сумленных і справядлівых выбараў.
- Мы не збіраемся нікога зрынаць, проста ў наступны раз просім правесці ўсё галасаванне і падлік бюлетэняў адкрыта, - патлумачыў адзін з актывістаў.
Адзін з мужчын, Сяргей Кузняцоў, дастаў белы ліст паперы і адразу быў затрыманы міліцыяй.
Акцыя пратэсту 1 траўня ў Баранавічах павінна была адбыцца а 12. Жыхароў Баранавічаў заклікалі трымаць у руках чыстыя аркушы паперы. Аналагічная акцыя запланаваная сёння ў Берасці.
Арганізатары акцыі ў Баранавічах былі ізаляваныя: Мікалая Чарнавуса-старэйшага выклікалі ў міліцыю на 12.00, а Мікалая Чарнавуса-малодшага заблакавалі ў сваёй кватэры праваахоўнікі.
Міліцыянты ў Баранавічах таксама захацелі «праверыць акрэдытацыю» здымачнай групы «Белсата». У выніку журналісты Вольга Чайчыц і Андрэй Козел былі затрыманыя.