Памёр вядомы палітолаг і дарадца прэзідэнта ЗША Збігнеў Бжэзінскі
12- 27.05.2017, 8:12
- 16,449
26 траўня ва ўзросце 89 гадоў памёр вядомы амерыканскі палітолаг, сацыёлаг і дзяржаўны дзеяч Збігнеў Бжэзінскі.
Пра гэта ў Instagram паведаміла дачка палітыка Міка Бжэзінскі.
Паводле інфармацыі газеты The New York Times, палітык памёр у шпіталі ў штаце Вірджынія.
Бжэзінскі нарадзіўся 28 сакавіка 1928 года ў сям'і польскіх дыпламатаў, у 1950-я гады атрымаў грамадзянства ЗША, дзе зрабіў акадэмічную кар'еру.
Займаўся даследаваннямі ў сферы сацыялогіі, паліталогіі, філасофіі. Асаблівую ўвагу ён надаваў вывучэнню СССР і сацыялістычных краін на прадмет супрацьстаяння «савецкай экспансіі».
У 1977-1981 гадах Бжэзінскі займаў пасаду дарадцы ў нацыянальнай бяспецы ў адміністрацыі прэзідэнта Джымі Картэра.
У апошнія гады вёў актыўную выкладчыцкую і кансультатыўную дзейнасць - узначальваў шэраг грамадскіх арганізацый, уваходзіў у кіраўніцтва некалькіх фондаў і кампаній, быў вядоўцам палітычных праграм на тэлевізіі, з'яўляўся экспэртам Цэнтра стратэгічных і міжнародных даследаванняў у Вашынгтоне.
Выкладаў у Школе паглыбленых міжнародных даследаванняў імя Пола Нітце пры Універсітэце Джонса Хопкінса. З'яўляўся пастаянным сябрам элітнага «Більдэрбергскага клуба», які аб'ядноўвае найбуйнейшых палітычных дзеячаў, банкіраў, кіраўнікоў транснацыянальных карпарацый, эканамістаў і палітолагаў.
Бжэзінскі вядомы таксама як аўтар кнігі «Вялікая шахматная дошка: панаванне Амерыкі і яе геастратэгічныя імператывы» (1997).