Лукашэнка бачыць пагрозу ў NATO і «пятай калоне»

Дыктатар заявіў, што адчувае сябе неспакойна.

«З нашай зямлі ніколі не зыходзіла і не будзе зыходзіць агрэсія. Мы давялі ўсім, што Беларусь мірная і прыязная краіна. Але гэта не значыць, што яна не можа за сябе пастаяць. Так, чужога нам не трэба, але і свайго мы не аддамо» , - сказаў А.Лукашэнка, выступаючы на святочных мерапрыемствах, прымеркаваных Дню Перамогі, паведамляе Інтэрфакс.

Дыктатар адзначыў, што ў свеце ўзрастае міжнародная напружанасць, адраджаюцца ідэі сусветнага панавання, у розных рэгіёнах планеты шугаюць узброеныя канфлікты. «Чалавецтва апынулася ля небяспечнай рысы новай вялікай вайны», - падкрэсліў ён.

«Пагроза існуе і для нашай Беларусі - ля нашых межаў назапашваюцца вайсковыя арсеналы, літаральна па суседстве размяшчаюцца вайсковыя базы, праводзяцца баявыя вучэнні і манеўры. З дапамогай нашай унутранай пятай калоны робяцца спробы дэстабілізаваць абстаноўку ўнутры краіны», - прадоўжыў Лукашэнка.

«Таму асаблівую значнасць набываюць пільнасць і гарантаванне бяспекі дзяржавы. Як зрэнку вока неабходна берагчы мір і згоду ў нашым родным доме. Мы павінны быць таксама адзіныя і цвёрдыя як нашы бацькі, дзяды, прадзеды ў пару суровых выпрабаванняў, тады ніхто не адважыцца праверыць нас на трываласць», - сказаў Лукашэнка.