Беларусы ў сацыяльных сетках: Тэрмінова прадам нырку, трэба раздаць пазыкі

Што можа чакаць аўтараў такіх аб'яў з пункту гледжання закона.

Усяго ад чорных трансплантолагаў пацярпелі трое грамадзян Беларусі. Аднаго прааперавалі ў Косаве, іншага - у Эквадоры, а ў трэцяга дасталі нырку ў Кіеве. Хтосьці з іх за продаж ныркі згуляў вяселле і адпачыў два тыдні ў Егіпце. А хтосьці за нырку купіў скутэр і ноўтбук, паведамілі тэлеканалу СТВ беларускія праваахоўнікі.

Чорныя трансплантолагі з Косава абяцалі хлопцу 10 тысяч даляраў, але пасля аперацыі ён атрымаў толькі 7. Астатнюю суму донар нібыта мог атрымаць пасля таго, як прывядзе яшчэ аднаго «прадаўца». Дарэчы, у гэтага праапераванага хлопца засталіся не толькі вялікія шнары на целе, але і ўзніклі праблемы са здароўем.

Цікава, што ахвярамі станавіліся далёка не бедныя людзі. Адзін хлопец быў прадпрымальнікам, а другі валодаў дзвюма кватэрамі.

А ці можна законна прадаць сваю нырку ў Беларусі? З гэтым пытаннем журналісты kp.by патэлефанавалі ў РНПЦ трансплантацыі органаў і тканак.

- Не. У Беларусі гэта забаронена, - адназначна адказалі ў клініцы.

Адмовай адказалі і ў Нацыянальным інстытуце хірургіі і транспланталогіі імя Шалімава ва Украіне. Нагадаем, што ў аднаго з беларусаў нырку выразалі ў Кіеве.

- У нас толькі роднасная перасадка органаў, - кажуць у інстытуце.

Нягледзячы на тое, што ні ў Беларусі, ні ва Украіне нельга гандляваць унутранымі органамі, у інтэрнэце можна знайсці шмат аб'яў аб продажы донарскай ныркі або печані. Напрыклад, у сацыяльных сетках.

- Буду донарам часткі печані, касцявога мозгу. Група крыві 4 (+). Узрост 27 гадоў. Вельмі тэрмінова патрэбныя грошы. Чакаю рэальных прапаноў, - піша ў «Вконтакте» 27-гадовая маладая мама з Украіны Людміла.

Сярод тых, хто гатовы ахвяраваць сваім органам, ёсць і беларусы.

- Тэрмінова прадам нырку, - піша 29-гадовы Міхаіл з Пінска.

У тэлефоннай размове з журналістамі ён прызнаецца: «Трэба раздаць пазыкі».

Дарэчы, замежнікам у Беларусі цалкам легальна перасадзяць нырку за грошы.

- У нас ёсць такая паслуга, як трансплантацыя нырак. Для замежных грамадзян перасадка ныркі каштуе 65 тысяч даляраў. У гэтую суму ўваходзіць абследаванне і аперацыя, - кажуць у медыцынскай кампаніі, якая працуе з замежнікамі. - Для замежнікаў дакладна такая ж чарга, як для грамадзян Беларусі. Гэта можа быць і год, і паўтара, і два.

- А вы не купляеце нырку?

- Не, вы што! Заканадаўствам гэта забаронена. Гэта крымінальная адказнасць, мы такім не займаемся.

Ці небяспечна жыць з аднаго ныркай?

- Дастаткова 25% нырачнай тканіны, каб арганізм нармальна функцыянаваў. Таму пазбаўленне адной ныркі на здароўе не адбіваецца. Але ёсць рызыка, што адзіная нырка можа запаліцца або ў ёй утвараецца пухліна або камяні, тады чалавек рызыкуе сваім жыццём, - кажа тэрапеўт Ігар Валынец. - Акрамя таго, людзям, якія маюць адну нырку, трэба весці здаровы лад жыцця - выконваць дыету, не піць, не курыць.