Як выглядае прагулка з лясунамі і русалкамі па беларускай пушчы

Якія сюрпрызы прыгатавала для турыстаў «сцежка міфаў» у Бярэзінскім запаведніку?

У велізарным зялёным прасторы Бярэзінскага біясфернага запаведніка за 120 км ад Менска адкрыўся аб'ект пад дзіўнай назвай - Цэнтр міфалагічнага турызму. Аўтары падышлі да стварэння комплексу крэатыўна і далі яму не менш дзіўную напоўненасць. Госць, прыйшоўшы сюды, патрапіць у свет беларускай міфалогіі, пройдзе па спецыяльных сцежках, паглядзіць інсталяцыі і скульптуры, паўдзельнічае ў інтэрактыве. Упершыню праект, закліканы прыцягнуць турыстаў, зрабіў упор на міфы і казкі, а не на сухія гістарычныя факты. Гучыць цікава, але як усё гэта выглядае, задаецца пытаннем onliner.by.

Нестандартнае для нашых шырот месца (што дзіўна, бо ў Беларусі поўна міфаў, якія так і просяцца асучасніць і пусціць у камерцыйнае рэчышча) створаны аб'яднаннем «Адпачынак у вёсцы» і Бярэзінскім запаведнікам у рамках праекта «Садзейнічанне пераходу Рэспублікі Беларусь да «зялёнай эканомікі». Праект фінансуецца Еўрапейскім звязам і рэалізуецца Праграмай развіцця ААН у партнёрстве з Міністэрствам прыродных рэсурсаў і аховы навакольнага асяроддзя РБ.

Цэнтр уключае ў сябе Музей міфалагічных істот, экспазіцыю пад адкрытым небам «Міфалагічны хутарок» і экалагічную сцежку «У краі міфаў».

- Ідэя ўнікальнай ініцыятывы ў тым, каб расказаць пра беларускую прыроду, выкарыстоўваючы вобразы з нацыянальнай міфалогіі, - распавялі ў прэс-офісе ПРААН у Беларусі. - Пры распрацоўцы праекта былі вывучаны даследаванні ў галіне беларускай міфалогіі. У аснове канцэпцыі музея ляжыць мадэль «Сусветнага дрэва». Тут турыстаў чакае загадкавы і незвычайны свет міфалагічных істот і духаў, які ўзноўлены з дапамогай тэатралізаваных гукавых і светлавых інсталяцый дзякуючы прымяненню сучасных аўдыёвізуальных прыёмаў.

Музей абсталяваны малой сонечнай электрастанцыяй, якая расказвае пра таямніцу энэргіі сонца сучаснай мовай.

Разыначка экалагічнай сцежкі - 17 незвычайных інсталяцый, створаных пры ўдзеле вядомых беларускіх дызайнераў і скульптараў. Сярод устаноўленых персанажаў - Русалка, Аржавейнік, Палявік, Пушчавік і іншыя.

- Продкі сучасных беларусаў лічылі, што кожны біятоп (лес, балота, вадаём, поле) мае свайго «апекуна» - лесуна, балотніка, палевіка і многіх іншых. І адносіны чалавека з прыродай рэгуляваліся гэтымі істотамі. Гэтую канцэпцыю адлюстроўваюць усе аб'екты створанага цэнтра.

Для экасцяжыны распрацавана начная экскурсія. Ідэя такая: з надыходам цемры госці адпраўляюцца ў падарожжа, прайшоўшы праз адмысловы «партал» і прамовіўшы традыцыйную беларускую змову, каб засцерагчы сябе ад цёмных сіл.

Аўтары праекта ўпэўнены, што адкрыццё першага ў Беларусі Цэнтра міфалагічнага турызму створыць умовы для развіцця экатурызму ў краіне і прыцягне ў біясферны запаведнік новых наведвальнікаў.