Праваабаронца: Такой адкрытай крывадушнасці я не сустракаў нават у міліцыі і судзе

Актывіст мае намер правучыць магілёўскі райвыканкам.

27 чэрвеня скончыўся судовы працэс паміж праваабаронцам Аляксандрам Хамратавым і Магілёўскім гарвыканкамам, які складаецца з 4-х судовых пасяджэнняў. Суддзя Аляксандр Бушкевіч прыняў бок уладаў і пастанавіў: Хамратаву Аляксандру Генадзьевічу ў задавальненні скаргі на неправамерныя дзеянні службовай асобы Магілёўскага гарадскога выканаўчага камітэта адмовіць.

Нагадаем, што Аляксандр Хамратаў звярнуўся ў суд са скаргай на неправамерныя дзеянні намесніцы старшыні гарвыканкама Алы Галушкі ў адмове яму ў атрыманні інфармацыі.

«Што хочацца адзначыць: на ўсе мае хадайніцтвы аб далучэнні довадаў пра тое, што відэаздымка вялася ў гарвыканкаме, такім чынам - яна існуе, такім чынам - мне яе павінны паказаць - суддзя адказаў адмовай. Суддзя гэта матываваў вельмі проста - гэта не мае дачынення да справы. Г.зн., ёсць маё працэсуальнае права на прадмет падачы довадаў судом успрымаецца як нешта вельмі своеасаблівае, калі чалавек хоча нешта давесці - звяртаецца ў суд, піша скаргі, плаціць за гэта дзяржпадатак - яму кажуць, што гэта не па сутнасці. Мы вам адмаўляем, і вашы довады не прымаем да ўвагі», - распавядае Аляксандр Хамратаў сайту 6tv.by - «Як і варта было чакаць, пастанова суда была цалкам прагназаванай і чаканай. Суддзя адмовіў, матывуючы гэта тым, што ў мяне няма такога права на атрыманне запісу асабістага прыёму, хоць запіс асабістага прыёму непасрэдна закранае мае правы і інтарэсы, хоць бы з пункту гледжання таго, што я там захаваны, альбо я асабіста, альбо мой голас і голас службовай асобы, з кім праводзіцца прыём».

«Другі момант, што суддзя адмовіў з той прычыны, што відэазапісу ў гарвыканкама няма, таму таксама трэба адмовіць у задавальненні маёй скаргі. Як я ўжо казаў пра тое, што відэазапіс ёсць і павінен быць - у мяне ёсць довады, але суддзі гэта нецікава. Суддзя слухаў толькі прадстаўніка гарвыканкама. Мае довады ён не захацеў успрымаць і належным чынам ацэньваць», - прадаўжае Аляксандр Хамратаў - «Атрымліваецца цікавая сітуацыя: Ала Аляксандраўна Галушка, усім вядомы ідэолаг у горадзе Магілёве і Магілёўскай вобласці, якая займае пасаду намесніцы старшыні Магілёўскага гарвыканкама, мне пад відэазапіс, з якім, дарэчы, можна азнаёміцца ў інтэрнэце, заяўляе, што вядзецца відэазапіс з боку гарвыканкама. А калі я пішу падаць яго - яна мне піша, што нельга. Хоць да гэтага кажа, што відэазапіс вядзецца і што можа быць выдадзены мне на маё патрабаванне».

«Такой адкрытай крывадушнасці і такіх непрыхаваных падвойных стандартаў я яшчэ не сустракаў нават у міліцыі і судзе! Мяне гарвыканкам гэтым увогуле здзівіў», - заявіў Аляксандр Хамратаў - «Паколькі гарвыканкам мяне ўвёў у зман - я звярнуўся ў суд, заплаціў дзяржпадатак...Я мяркую, што такімі дзеяннямі мне прычыненая шкода ў выглядзе страт сумай 1 базавай адзінкі. І я звярнуся з пазовам, дзе адказчыкам будзе праходзіць Магілёўскі гарвыканкам. Падам заяву, аб выніках якой я, вядома, буду трымаць вас усіх у курсе».