Патрыёт Алесь Яўдаха: На заявы аднаго «дзеяча» ўвагі не звяртаю

Абсурднасць «справы патрыётаў» добра адчувалася за сценамі СІЗА №1

Учора былі адпушчаныя з-пад варты некаторыя фігуранты справы патрыётаў, сярод іх - распаўсюднік беларускіх кніг Алесь Яўдаха. Карэспандэнт nn.by пагутарыў з ім адразу пасля вызвалення.

«Утрыманне было больш-менш. На Валадарскага ўмовы ўтрымання былі лепшыя. Лепшае стаўленне, больш месца. Калі не лічыць катаваннем форму затрымання, то ніякіх катаванняў не было.

Людзям, што знаходзіліся побач са мной, было лепш відаць, як мяне затрымлівалі. Мне далі ў морду - і закінулі ў бусік. Што да здароўя, то я выдатна сябе адчуваю, удавалася падтрымліваць форму.

Я тэлевізар не гляджу, на заявы аднаго дзеяча ўвагі не звяртаю, таму я наогул не быў у курсе сітуацыі аб нейкіх баевіках. У мяне яшчэ нават не паспела мільгануць якая б то ні было думка, мне адразу ўсё распавялі хлопцы, якія мяне затрымлівалі: «Табе што, дрэнна жыць у гэтай краіне?»

Учора ў калідорах бачыў кагосьці з хлопцаў. Я так разумею, што нас перавялі ў рэжым «лайт». Раней у калідоры побач са «змоўшчыкамі» не перасякаліся. У мяне быў адзін-два допыты. Я спачатку даў паказанні па «беспарадку», потым да мяне прыходзілі абвясціць другое абвінавачванне, я адмовіўся даваць паказанні. Два з паловай месяцы я так праседзеў без нічога, а пасля таго як справу перадалі ў Следчы камітэт, то я мінімальна пагутарыў з новай жанчынай-следчым.

Газеты, лісты атрымліваў. Ступень цэнзуры мне не вядомая. На жаль, газеты, на якія мяне падпісалі, ігнаравалі чэмпіянат Беларусі ў футболе, таму не ведаў, як там менскае «Дынама».

Атрымаўся як бы трохмесячны адпачынак на працы. Паглядзім, у якім там стане ўсё цяпер».

Нагадаем, што ўчора на волю з СІЗА №1 у Менску выйшлі яшчэ чацвёра палітвязняў-патрыётаў: Уладзімір Румянцаў, Цімур Пашкевіч, Алесь Яўдаха і Віктар Данілаў. За кратамі застаюцца яшчэ сямёра палітвязняў па сфабрыкаванай КДБ «справе патрыётаў».