Пяць маршрутаў для падарожжаў на вялікіх выходных

Дзе ў Беларусі можна адпачыць «бліжэй да вады».

Раз на гэтыя выхадныя вельмі горача, гараджане выязджаюць з горада. Citydog рэкамендуе, як распачаць асвяжальнае падарожжа.

Аўгустоўскі канал

Калі вы яшчэ там не пабывалі - то лепш нікому не прызнавайцеся, а з’ездзіце хуценька. Варыянтаў процьма: узяць аўто, паехаць у Гародню на цягніку, а далей сесці ў аўтобус, прыехаць з роварамі і катацца ўсюды або ўзяць іх на месцы, далучыцца да экскурсійных турыстаў або сесці ў байдарку.

Можна перасоўвацца ад шлюза да шлюза, купацца, заходзіць у сядзібы і палацава-паркавыя комплексы, глядзець касцёлы і абарончыя збудаванні, пагуляць па парку, пакатацца на катэры, вярнуцца ў Горадню і зладзіць там вечарынку. А то і скончыць свой маршрут шопінгам у Беластоку!

Блакітныя азёры Палесся

Гэты маршрут зойме больш чым 160 км, так што можна паспрабаваць часткова на аўтамабілі, часткова з роварам, і пашпарт вазьміце, калі хочаце пагуляць напоўніцу. Спіс пунктаў такі: Дамачава, возера Белае, возера Рагазнянскае, Маларыта, возера Олтуш, возера Арэхаўскае, Ежа (Украіна), возера Пясочнае, Шацк, возера Свіцязь, Пішча, Камароўка, возера Селяхі. Самыя вядомыя з іх - Белае, Рагазнянскае і Свіцязь.

У вёсцы Камароўцы рэкамендуюць музей касманаўтыкі, заказнік «Селяхі» выдатны тым, што там захоўваюць рэліктавую папараць, па дарозе ёсць яшчэ гідралагічны заказнік «Прыбужскае Палессе», і (калі пашпарт не забыліся) - зазірніце ва ўкраінскі нацыянальны парк «Шацкія азёры».

Ад Менска да Дамачава: 391 км.

Крыніцы на Магілёўшчыне

Гэты маршрут таксама быццам як веласіпедны, але мы не гатовыя столькі катацца ў спякоту, так што лепш выберамся з максімальным камфортам (аўто плюс пешшу). Пункты такія (выезд з Магілёва): Радомля, Мсціслаў, Пустынкі, палац Пацёмкіна, Палыковіцкая крыніца, Блакітная крыніца. Апошняя наогул па-вар'яцку прыгожая, і купацца там можна - не забудзьцеся ручнік!

У Мсціславе можна перакусіць, паглядзець гарадзішча, барочныя фрэскі (і нават «Збіванне ксяндзоў»), а яшчэ шукайце мсціслаўскія кафлі.

Браслаў і ваколіцы

Можаце ўзяць ровары ў Браславе і паехаць катацца (азёр шмат, так што, дзе асвяжыцца, заўсёды знойдзеце), а можна і не вылазіць з аўтамабіля (але часам усё адно трэба, прыродаахоўныя зоны). Варыянтаў процьма: гістарычны (35 км - вёскі Іказнь, Слабодка, Шаўра і назад у Браслаў), прыродны (21 км па цэнтральнай частцы Нацыянальнага парку - вёскі Літоўшчына, Шаўра, Рубеж), азёрны (сапраўдней - 110 км - вёскі Слабодка, Луні, Лявошка, Краснагорка, Лукшы, Струста, або карацей - 32 км - в. Рубеж, Муражы, Гусараўшчына, Струста, Жвірбля, Краснасельцы).

Мы нават распавядаць вам не будзем, як там класна, - самі ўсё ўбачыце і палюбіце назаўжды.

Мядзельскія азёры

Іх уважаюць за адны з самых чыстых у Беларусі, ад Менска не надта далёка, і дарога як у Швэйцарыі. Самае ўлюбёнае наша месца там называецца возерам Белым (як і многія добрыя азёры на радзіме), недалёка ёсць класнае месца для шпацыру і пікніка «Аптэкарскі сад», а калі не сядзіцца на месцы і цягне на прыгоды - ваша месца ў якім-небудзь турыстычным пункце накшталт санаторыя «Нарач» або сядзібы «Наносы» (кухня і музей там вас пацешаць, не сумняваемся).