Чаму так значна падаражэў еўра?

На таргах на Беларускай валютна-фондавай біржы еўра падаражэў адразу на 4 капейкі.

У чацвер еўрапейская валюта дадала яшчэ капейку, і афіцыйны курс еўра на пятніцу складае 2,2088 беларускага рубля. Што адбываецца? Чаму еўра даражэе і што будзе далей?

- Гэта ўсё простае следства таго, што адбываецца на міжнародным валютным рынку. Цяпер еўра ўмацоўваецца да большасці сусветных валют. А адбываецца гэта ў сувязі з апошнімі заявамі старшыні Еўрапейскага цэнтральнага банка, які намякнуў, што хутка яны могуць пачаць рабіць больш жорсткай грашова-крэдытную палітыку, - тлумачыць kp.by фінансавая кансультантка TeleTrade (ТАА «ТэлетрэйдБел») Жанна Кулакова. - Нагадаю, што з 2014 года еўра да даляра абрынуўся амаль на траціну. І адной з галоўных прычын стала маштабная эмісія ЕЦБ: кожны месяц яны ўкідваць у эканоміку велізарныя сумы - па 60-80 млрд еўраў. Гэта робіцца для таго, каб разагнаць інфляцыю і прымусіць эканоміку расці. Але еўрапейская эканоміка ўжо выйшла з зоны дэфляцыі і галоўныя мэты ЕЦБ фактычна дасягнутыя.

Цяпер высокая імавернасць таго, што ЕЦБ паступова будзе згортваць эмісію і павышаць адсоткавыя стаўкі. Цяпер у іх асноўная адсоткавая стаўка роўная нулю, а дэпазітныя наогул адмоўныя. Гэта ўсё ціснула на еўра ў апошнія гады. Але негатыўны ўплыў гэтых фактараў ужо вычарпаны, і калі ЕЦБ сапраўды пяройдзе да паступовага ўзмацнення жорсткасці, то для еўра адкрываюцца вельмі добрыя перспектывы росту пасля такога падзення. Тым больш, што даляр цяпер пад ціскам. Не здзіўлюся, калі ў найбліжэйшыя год-два мы ўбачым працяглы перыяд росту еўра, які будзе адыгрываць згубленыя пазіцыі. Цалкам магчыма, што праз паўгода-год мы ўбачым суадносіны даляра і еўра на ўзроўні 1,2.

- У канцы мінулага года многія экспэрты казалі, што вось-вось даляр і еўра зблізяцца або нават даляр будзе даражэйшым, чым еўра. Гэты прагноз ужо не актуальны?

- Думаю, не. Гэта магло адбыцца некалькі гадоў таму, калі ЕЦБ толькі пачаў змякчэнне эканомікі, а ФРС, наадварот, перайшла да ўзмацнення жорсткасці. Вось тады, на хвалі агульнай нервовасці і негатыўных чаканняў інвестараў, даляр і еўра сапраўды маглі зраўняцца. Ці сёлета, калі б на выбарах у Францыі перамагла Марын Ле Пэн і Францыя перайшла б на франкі. Але і гэта рызыка не рэалізавалася. Цяпер я не бачу для еўра такіх рызык, якія маглі б яго абрынуць. Наадварот, бачу толькі перадумовы для росту.