Пачалі руйнаваць дамы ў Трактарным пасёлку Менска
15- 29.06.2017, 20:39
- 31,085
Улады праігнаравалі шматлікія просьбы жыхароў пасёлка аб скасаванні пастановы пра зруйнаванне іх дамоў.
У Трактарным пасёлку ў Менску пачалі руйнаваць малапавярховую забудову. Замест 2-павярховых дамоў у квартале вуліц Стаханаўскай, Клумава, Шчарбакова, Чабатарова маюць намер узвесці панэльныя дамы «новага пакалення», паведамляе «Радыё Свабода».
Раней мясцовыя жыхары накіравалі ў адміністрацыю Партызанскага раёна і адміністрацыю Лукашэнкі зварот са 176 подпісамі. Просьба была адна - скасаваць рашэнне аб зруйнаванні іх дамоў.
Аўтары адзначаюць, што праект забудовы тэрыторыі 5-7-павярховымі дамамі быў зацверджаны 10 гадоў таму. З цягам часу ён састарэў і быў скарэкціраваны, а гэта азначае неабходнасць новага грамадскага абмеркавання ўсяго праекта.
Актывісты і неабыякавая грамадскасць спадзяваліся, што іх шматлікія просьбы і петыцыі будуць пачутыя ўладамі, а горад пазбегне чарговага канфлікту і супрацьстаяння.
Аднак публічнае абмеркаванне канфліктнай сітуацыі адміністрацыя Партызанскага раёна Менска прызначыла толькі на сённяшні вечар - фактычна пасля таго, як цяжкая тэхніка прыступіла да разбурэння мясцовай забудовы.
Дарэчы, у звароце падпісанты просяць раённую адміністрацыю ўсталяваць памятны знак, прысвечаны заснаванню пасёлку, які адным з першых паўстаў у разбураным вайной Менску.