Лявон Баршчэўскі: У стасунках з Украінай Лукашэнка азіраецца на Крэмль
3- 27.07.2017, 10:44
- 9,041
Беларускі дыктатар толькі імітуе самастойнасць.
Грамадскі дзеяч Лявон Баршчэўскі распавёў у інтэрв'ю «Радыё Рацыя», як у палітыкаў словы разыходзяцца са справамі.
Падчас нядаўняй сустрэчы ў Кіеве Лукашэнка паабяцаў Пятру Парашэнку дазволіць вывучэнне ўкраінскай мовы на тэрыторыі Беларусі.
Тым часам у снежні 2014 года, пасля сустрэчы Лукашэнкі і Парашэнкі было абвешчана, што «адным з вынікаў сустрэчы стала дамоўленасць пра ўключэнне ўкраінскага ТБ-канала ў беларускую сетку вяшчання». Праўда, тыя дамоўленасці так і засталіся на паперы. Ніякага ўкраінскага тэлеканала няма ў Беларусі да гэтага часу:
– Кідаць словы заўсёды проста, а чымсьці канкрэтным заняцца – гэта ўжо складаней. А самае галоўнае, што гэтае пытанне (запуск украінскага тэлеканала) і правы ўкраінцаў беларускую ўладу не вельмі і хвалююць. Іх турбуе, каб, з аднаго боку, не раззлаваць Маскву, а з другога, самае лепшае – гэта нічога не рабіць. Калі не планаваць і не рабіць адмысловую інстытуцыю, якая будзе займацца гэтай праблемай, то ўсё так і застанецца на паперы. І планы вывучэння ўкраінскай мовы ў Беларусі могуць апынуцца на той самай стадыі, што цяпер і праект украінскага тэлеканала ў нашай краіне. Праўда, Лукашэнка пра яго ўжо не згадвае і не заяўляе. Тры гады прайшлі – з'явіліся новыя ідэі.
– З'яўленне ўкраінскага тэлеканала было б добрай справай?
– Безумоўна, бо яго глядзела б дастаткова шмат людзей. Беларусы даведаліся б, што адбываецца ва Украіне не з расейскіх тэлеканалаў, а з першакрыніцаў. Хоць расейская прапаганда мае значна большыя магчымасці, і нават адзін украінскі тэлеканал не змог бы стварыць баланс.