Міністр-камуніст Карпенка: З верасня будзем вучыць кітайскую мову
48- 27.07.2017, 14:44
- 18,126
З новага навучальнага года ў беларускіх школах вывучэнне кітайскай мовы будзе пашыранае.
Пра гэта заявіў міністр адукацыі Беларусі Ігар Карпенка сёння на сустрэчы з прэзідэнтам Хефейскага тэхналагічнага ўніверсітэта (КНР) Лянь Лянем, паведамляе БелТА.
З наступнага навучальнага года будзе пашыранае вывучэнне кітайскай мовы ў Беларусі, і працэс будзе прадаўжацца. Гэта абумоўлена рэалізацыяй маштабных сацыяльна-эканамічных і інвестыцыйных праектаў, сярод якіх асабліва вылучаецца Кітайска-беларускі індустрыяльны парк «Вялікі камень», - сказаў Ігар Карпенка.
Ён звярнуў увагу, што ў Беларусі ўжо працуюць такія буйныя кампаніі, як Huawei, ZTE, будаўнічыя карпарацыі.
- Усё гэта сведчыць пра важнасць вывучэння кітайскай мовы грамадзянамі нашай краіны для таго, каб рэалізоўваць пагадненні, укладзеныя на высокім узроўні, - адзначыў міністр.
Кітайская дэлегацыя наведала ўстановы адукацыі ў Менску, у тым ліку Беларускі дзяржаўны ўніверсітэт, Беларускі дзяржаўны ўніверсітэт культуры і мастацтваў, Беларускі дзяржаўны тэхналагічны ўніверсітэт. Бакі абмяркоўвалі розныя варыянты «паглыблення супрацоўніцтва».
Так, напрыклад, тры спецыяльнасці ў Хефейскім тэхналагічным універсітэце падобныя на спецыяльнасці ў БДТУ. Дасягнутая папярэдняя дамоўленасць аб стварэнні супольных навучальных праграм. Напрыклад, прапануецца арганізаваць навучанне на такіх спецыяльнасцях па сістэме 2+2, калі па два гады студэнты будуць навучацца ў Беларусі і ў Кітаі.
У выніку было падпісанае пагадненне аб акадэмічным і навуковым супрацоўніцтве паміж БДТУ і Хефейскім тэхналагічным універсітэтам.