Мечыслаў Грыб: Міліцыянты ў нашы дні не ў пашане
19- 28.07.2017, 10:16
- 10,890
Да чаго прывядзе дэфіцыт кадраў у МУС?
З пачатку гэтага года агульны некамплект Гарадзенскага гарнізона міліцыі вырас з 8,7% да 9,1%, у параўнанні з аналагічным перыядам мінулага года павялічыўся амаль удвая.
Гэтая інфармацыя прагучала на аператыўнай нарадзе кіраўніцтва УУС Гарадзенскага аблвыканкама ў Лідзе.
Адразу некалькі раённых аддзелаў вобласці не змаглі знайсці ні аднаго ахвочага для паступлення ў Акадэмію МУС.
Грыб: «Няма сёння матывацыі працаваць у міліцыі»
Генерал-лейтэнант міліцыі ў адстаўцы, былы начальнік упраўлення ўнутраных спраў Віцебскага аблвыканкама Мечыслаў Грыб чакае росту нагрузкі на супрацоўнікаў праваахоўных органаў.
- Такі працэнт недакамплекту асабістага складу - гэта шмат. Аб'ёмы працы пры гэтым захоўваюцца. Ці будзе 1% дэфіцыту кадраў або 20, краіна застаецца ранейшай, як і крымінагенная сітуацыя. Злачынны свет не глядзіць на тое, колькі ў нас не стае міліцыянтаў. Ён жыве па сваіх правілах і меркаваннях. Таму, безумоўна, нагрузка на дзейных супрацоўнікаў міліцыі ўзрасце. Якім бы ні быў паказчык недакамплекту асабістага складу, гэта не з'яўляецца прычынай для адмовы выконваць службовыя абавязкі, - мяркуе суразмоўца «Заўтра тваёй краіны».
Генерал-лейтэнант міліцыі ў адстаўцы нагадвае, што ў часы БССР міліцыянтаў было ў разы менш, насельніцтва - больш, чым сёння:
- І спраўляліся. Сёння трэба скарачаць міліцыю. Але рабіць гэта трэба разумна, падлічыўшы ўсё да дробязяў.
Кажучы пра прычыны адтоку кадраў з міліцыі, Мечыслаў Грыб падкрэслівае:
- Праца міліцыянта ў нашы дні не ў пашане. Вялікіх заробкаў тут няма, за апошнія 5-6 гадоў іх сума не пераглядалася. А кошты растуць, усё даражэе. Мы ўсе апынуліся ў такой сітуацыі, і міліцыя ў тым ліку. Пры гэтым рызыка для здароўя і жыцця ў гэтай прафесіі прысутнічае заўсёды. Няма зацікаўленасці матэрыяльнай і маральнай у гэтай працы сёння.
Казлоў: Шмат каму маральна цяжка складаць пратаколы любой цаной
Падпалкоўнік міліцыі ў адстаўцы Мікалай Казлоў таксама кажа пра непазбежнасць росту нагрузкі на пакінутых супрацоўнікаў міліцыі.
- Як правіла, такога роду вакансіі ўтвараюцца там, дзе шмат цяжкай і няўдзячнай працы. А калі яшчэ ўлічыць і стаўленне кіраўніцтва да падначаленых - мы ж бачым, як міліцыянты не выходзяць на працу праз тое, што перапрацоўваюць звышурочна, праз патрабаванні выконваць планы ў пратаколах і рабіць тое, што выходзіць за рамкі службовых абавязкаў. Бо ў гэтыя абавязкі не ўваходзіць складанне пратаколаў любой цаной. Для многіх гэта досыць складана маральна, - тлумачыць прычыны адтоку кадраў з органаў унутраных спраў экс-падпалкоўнік міліцыі.
Мікалай Казлоў таксама нагадвае аб нізкай матэрыяльнай зацікаўленасці беларускіх міліцыянтаў: заробкі невысокія, нагрузкі вялікія.
На думку суразмоўцы «Заўтра тваёй краіны», за кошт скарачэння колькаснага складу міліцыі можна было б павялічыць заробак пакінутым супрацоўнікам.
- Абсалютна неабходна весці якасны адбор супрацоўнікаў. Калі чалавек прафесіянал, ён выклікае павагу ва ўсіх, з кім яму даводзіцца мець справу, - дадае экс-міліцыянт.
У якасці ўдалага прыкладу рэформы структур МУС Мікалай Казлоў прыводзіць Грузію:
- Раней там была адна з самых карумпаваных міліцый на постсавецкай прасторы. Цяпер жа грузінская паліцыя - адзін з самых паважаных дзяржаўных інстытутаў у краіне. Вельмі простае пытанне: калі гэта змаглі зрабіць у Грузіі, то чаму такое немагчыма зрабіць у нас? Мы, як мінімум, нічым не горшыя.
Пры гэтым у Мікалая Казлова ёсць сумненні наконт паўтарэння грузінскага варыянту ў Беларусі пры цяперашняй уладзе. На яго думку, галоўнай задачай сённяшняй міліцыі з'яўляецца падаўленне іншадумства і папаўненне бюджэту за кошт штрафаў.