У Барысаве ўзбунтаваліся міліцыянты

Дзялянкавыя міліцыянты месяц адмаўляюцца выходзіць на працу.

За апошні месяц пяць супрацоўнікаў міліцыі Барысаўскага РУУС напісалі заявы на звальненне, але кіраўніцтва не спяшаецца іх падпісваць. Некаторыя маладыя спецыялісты звязаныя кантрактамі на пяць гадоў і, сышоўшы з органаў унутраных спраў, мецьмуць выплаціць дзяржаве па 10 тысяч даляраў. Але нават гэта іх не спыняе. А раз заявы кіраўніцтва не падпісвае, яны сядзяць дома і чакаюць, пакуль іх звольняць за прагулы.

- Цяпер гэтая сітуацыя старанна хаваецца, каб не ўзнікла такога разгаласу як у Крычаве, - распавядае tut.by супрацоўнік праваахоўных органаў, які добра ведае гісторыю ў Барысаве. – Рэч у тым, што за апошні месяц 5 дзейных супрацоўнікаў Барысаўскага РУУС паспрабавалі звольніцца, але раз штат не ўкамплектаваны, міліцыянтаў не стае, то страціць столькі чалавек недапушчальна. Таму кіраўніцтва не падпісвае заявы, проста шматае і ўсё.

Паводле ягоных слоў, супрацоўнікі спрабуюць звольніцца праз безупынныя парушэнні працоўнага заканадаўства.

- Маглі сабраць у асабісты час, сысці з працы на часе было нельга, дзяжурная частка адмаўлялася прымаць зброю, і супрацоўнік ужо не мог пакінуць службу. Патрабавалі паказчыкі, пагражалі, калі нікога не затрымаеш, звольнім. Трэба было штовечар затрымліваць п'яніц, каб раніцай вадзіць на камісію. Да таго ж кіраўніцтва адмаўлялася даваць адпачынак, калі паказчыкі былі не тыя, - сцвярджае супрацоўнік.

Як стала вядома, з 14 чэрвеня трое інспектараў проста перасталі выходзіць на працу. Афіцыйна - яны супрацоўнікі міліцыі, але ў рэчаіснасці - сядзяць дома. Нам выпала звязацца з некаторымі, яны адразу робяць агаворку: «Не было ніякай змовы, афіцыйнай скаргі на кіраўніцтва, кожны захацеў сысці сам сабой».

- Эмацыйна спарахнеў. Так, не выйшаў на працу. Проста прыняў такую пастанову, і даваць нейкія каментары зараз нізка, я шэсць гадоў прапрацаваў у гэтай сістэме. Цяпер расставіў прыярытэты, сям'я стала важнейшай - распавядае адзін з міліцыянтаў.

Двое іншых ягоных калегаў апынуліся ў больш далікатнай сітуацыі. Хлопцы, маладыя спецыялісты, якія скончылі спецыялізаваную ВНУ, павінны пяць гадоў адпрацаваць паводле кантракту. Праблема ў тым, што яны прапрацавалі толькі 2 гады. Калі звольняцца, кожнаму давядзецца выплаціць па 10 тысяч даляраў. Менавіта столькі грошай было выдаткавана, пакуль яны вучыліся «на бюджэце» і знаходзіліся на ўтрыманні ў дзяржавы.

- Ідзе службовая праверка, дакументы перададзеныя ў Менск. Нават не ведаю: звольнены я ўжо афіцыйна ці яшчэ не, - каментуе супрацоўнік Барысаўскага РУУС. - Шкада, што не далі працаваць. Я свядома выбіраў гэтую прафесію. Чаму сышлі? Ненармаваны працоўны дзень, выходныя забіралі, хоць паводле заканадаўства могуць выклікаць толькі ў выпадку надзвычайнай сітуацыі. І то гэта тычыцца супрацоўнікаў МНС, брыгады хуткай дапамогі, а не мясцовых міліцыянтаў. Так, магчыма, дзесьці былі хібы, дык мы маладыя, паказчыкі былі нядрэнныя.

Адзін з службоўцаў успамінае, калі перастаў выходзіць на службу, яму кіраўніцтва затэлефанавала са словамі: «Будзь мужчынам! Выходзь на працу». Не выйшаў. Разам з калегамі заяву на звальненне напісалі яшчэ два супрацоўнікі РУУС. Адзін з іх падпалкоўнік. Ён 10 гадоў прапрацаваў у міліцыі, у траўні падоўжыў кантракт, а ў чэрвені захацеў сысці. Надоечы з ім скасавалі кантракт паводле пагаднення старон.

- Сапраўды, трое супрацоўнікаў Барысаўскага РУУС не выходзяць на службу. Асноўная прычына - нежаданне сумленна выконваць службовыя абавязкі. Адзначу, што ўсе гэтыя супрацоўнікі маюць дысцыплінарныя спагнанні, у большасці выпадкаў за неналежны разгляд зваротаў і заяў грамадзян. Паводле факту прагулаў ва ўстаноўленыя тэрміны праведзеная службовая праверка. Супрацоўнікі будуць звольненыя з органаў унутраных спраў. Барысаўская РУУС працуе ў штатным рэжыме, - каментуе Яўген Сачок, афіцыйны прадстаўнік УУС Менскага аблвыканкама.