Заўтра ўезд у Беласток будзе часова абмежаваны
- 8.07.2017, 18:13
- 14,005
Рух праз пункт пропуску «Баброўнікі» абмяжуюць праз аперацыю ў абясшкоджванні бомбы.
Пункт пропуску будзе зачынены з 12 да 16-й гадзіны. Звязана гэта з тым, што ў горадзе знайшлі бомбу часоў Другой сусветнай вайны вагой 500 кг, а на нядзелю прызначаная аперацыя ў яе абясшкоджванні і эвакуацыя 10 тысячаў мясцовых жыхароў, піша tut.by.
Пра абмежаванне руху транспарту ў раёне пункта пропуску «Баброўнікі» 9 ліпеня паведаміў старшы афіцэр аддзялення інфармацыі і прапаганды Гарадзенскай памежнай групы Міхаіл Скарына, паведамляе Дзяржпамежкамітэт Беларусі.
«Паводле інфармацыі памежнай службы Польшчы, у нядзелю з 12 да 17-й будуць праводзіцца рамонтныя працы на аўтадарозе ад пункта пропуску “Баброўнікі” (з беларускага боку пункт пропуску “Бераставіца”) да Беластока. Дзяржпамежкамітэт просіць улічваць гэтую інфармацыю пры планаванні паездак за мяжу», – сказана ў паведамленні.
Бомбу знайшлі працоўныя, якія рамантавалі дарогу на вуліцы Цыялкоўскага ў Беластоку 6 ліпеня. Гэта снарад часоў Другой сусветнай вайны вагой 500 кілаграмаў, 220 з якіх – гэта выбуховае рэчыва. Гэта самая буйная бомба, якую знайшлі ў гэтым рэгіёне. Радыус паразы пры выбуху складае 1300 метраў, паведамляе bialystokonline.pl.
Будаўнікі адразу ж выклікалі паліцыю, а тая ваенных сапёраў.
На прэс-канферэнцыі, якая прайшла 7 ліпеня ў Беластоку, мэр горада Тадэвуш Трускаляскі сказаў, што цяпер бомба не ўяўляе небяспекі і знаходзіцца пад кантролем спецыяльных службаў. Рызыка можа з'явіцца тады, калі яе пачнуць падымаць і вывозіць з будпляцоўкі.
Гэтая аперацыя запланаваная на нядзелю з 12 да 16-й гадзіны. Да гэтага часу маюць намер эвакуяваць мясцовых жыхароў з тэрыторыі радыусам 1400 метраў. У Беластоку – гэта 7 тысячаў чалавек з 60 вуліцаў. Таксама эвакуяваць будуць жыхароў з гміны Супрасль – з мястэчак Засценкі і Грабуўцы вывезуць 2762 чалавек.