Алег Воўчак: Шуневіч уводзіць закамуфляваную прымусовую працу
10- 17.08.2017, 15:09
- 24,208
У МУС «натхніліся» дэкрэтам аб «дармаедах» і наважыліся зрабіць свой унёсак.
16 жніўня стала вядома аб стварэнні ў рамках крымінальна-выканаўчай сістэмы МУС спецыялізаванага сельгаспрадпрыемства для працаўладкавання былых зняволеных. Такую ініцыятыву агучыў кіраўнік МУС Ігар Шуневіч.
У якасці эксперыментальнай базы было абрана КСУП «Хутар-Агра» ў Светлагорскім раёне.
«Гэта закамуфляваная форма прымусовай працы», - заявіў у каментары «Белсату» былы следчы пракуратуры, праваабаронца Алег Воўчак.
Праваабаронца таксама прыгадаў, што такая практыка мела месца ў Расейскай імперыі і ў СССР. «Нічога добрага з гэтага не выйдзе», - упэўнены Воўчак.
Былы следчы таксама выказаў меркаванне, што МУС натхніўся дэкрэтам аб «дармаедах» і спрабуе паказаць сваю актыўнасць у барацьбе з беспрацоўем.
«Шуневіч - несамастойная фігура. Ён не распрацоўваў гэтыя наватарскія ідэі самастойна», - мяркуе Воўчак.
Са слоў Ігара Шуневіча, прававой пастановы на перадачу ў структуру крымінальна-выканаўчай сістэмы МУС КСУП «Хутар-Агра» пакуль няма.