Затрыманы трэці падазраваны ў тэракце ў Барселоне
- 18.08.2017, 11:37
- 10,899
Паліцыя Каталоніі правяла спецаперацыю затрымання ў горадзе Рыполь.
У Каталоніі затрыманы трэці падазраваны ў датычнасці да ўчынення тэракту ў Барселоне. Пра гэта ў сваім twitter паведаміла паліцыя рэгіёну.
Падрабязнасці пра затрыманага не паведамляюцца. Вядома толькі, што гэты чалавек затрыманы ў горадзе Рыполь.
S'ha fet un tercer detingut a Ripoll en el marc del dispositiu policial dels atemptats#Cambrils #Barcelona
— Mossos (@mossos) 18 августа 2017 г.
Раней паведамлялася аб затрыманні дваіх падазраваных у датычнасці да тэракту, гэта выхадцы з Паўночнай Афрыкі. Як паведаміла паліцыя, кіроўцы фургона, які ўчыніў наезд на пешаходаў на бульвары Рамбла, сярод іх не было.
Мікрааўтобус, які быў задзейнічаны ў нападзе на турыстаў у Барселону. ФОТА: REUTERS
17 жніўня мікрааўтобус наехаў на пешаходаў у Барселоне. Паводле апошніх звестак, загінула 13 чалавек, пацярпелі больш за 100. Адказнасць за тэракт узяла на сябе групоўка «Ісламская дзяржава».
Некалькі гадзінаў пазней група тэрарыстаў спрабавала здзейсніць аналагічны тэракт у курортным каталонскім гарадку Камбрыльсе. На аўтамабілі Audi яны заехалі ў натоўп мінакоў. У выніку пацярпелі шэсць чалавек, двое з іх у цяжкім стане. Гэтым разам побач была паліцыя, якая стрэламі спыніла машыну, падчас перастрэлкі быў паранены адзін паліцэйскі. Былі застрэленыя чацвёра тых, хто нападаў, яшчэ адзін пазней памёр у бальніцы.
Паводле звестак гішпанскіх уладаў, пры тэракце пацярпелі грамадзяне не менш як 24 краін. Сярод загінулых або пацярпелых - грамадзяне Францыі, Нямеччыны, Гішпаніі, Нідэрландаў, Аргенціны, Венесуэлы, Бельгіі, Аўстраліі, Вугоршчыны, Перу, Румыніі, Ірландыі, Грэцыі, Кубы, Македоніі, Кітая, Італіі, Алжыра і Расеі. Пры гэтым не ўдакладняецца, хто з іх паранены ці загінуў.
Інфармацыі пра грамадзян Беларусі сярод пацярпелых у Барселоне няма. Амбасада Беларусі ў Гішпаніі працягвае адсочваць сітуацыю.
У сувязі з трагічнымі падзеямі ў краіне аб'яўлена трохдзённая жалоба. Хвіліна маўчання пройдзе сёння на плошчы Каталоніі ў Барселоне апоўдні па мясцовым часе (13.00 паводле беларускага). Паліцыя просіць грамадзян прыходзіць на жалобныя мерапрыемствы без заплечнікаў і вялікіх торбаў.
