Харчаванне дзяцей у школах з 1 верасня будуць аплачваць па-іншаму

Наколькі гэта ўдарыць па кішэні бацькоў, у Міністэрстве адукацыі пакуль яшчэ вырашаюць.

З пачатку новага навучальнага года аплачваць харчаванне ў менскіх школах стане прасцей. Бацькам больш не давядзецца перадаваць класнаму кіраўніку гатоўку за сняданкі і абеды, цяпер усе разлікі будуць праходзіць праз сістэму АРІП, паведамляе tut.by.

Кожнае дзіця атрымае нумар асабовага рахунку, куды бацькі і будуць пералічваць грошы за харчаванне. Плаціць за сняданкі і абеды мамы і таты змогуць праз СМС-банкінг, банкамат або ў банку. Увогуле, так, як разлічваюцца за падручнікі або гурткі.

- Мы яшчэ прадумваем: альбо бацькі будуць плаціць за месяц наперад, альбо за два тыдні, каб менш было, або па факце, - тлумачыць Вольга Езапенкава, начальніца аддзела грамадскага харчавання Галоўнага ўпраўлення спажывецкага рынку Менгарвыканкама. - Хутчэй за ўсё - наперад, таму што камбінату школьнага харчавання трэба закупляць прадукты.

Да верасня, кажа спецыяліст, механізм адпрацуюць. Раней па безнаяўнай сістэме разліку харчаванне аплачвалі толькі ў навучальных установах, дзе дзейнічала карта навучэнца.

- Увесь свет ужо працуе па такой сістэме. Чаму б і нам на яе не перайсці, - працягвае Вольга Езапенкава. - Пры безнаяўнай аплаце ўсё выразна і празрыста. У той жа час так зручней і класным кіраўнікам, і загадчыкам вытворчасцю: не трэба нікуды гэтыя грошы здаваць і інкасаваць.

Нагадаем, у студзені Міністэрства адукацыі забараніла бацькоўскім камітэтам збіраць гатоўку ў школах і дзіцячых садках.

- Калі бацькі хочуць пералічыць грошы школе, яны могуць гэта зрабіць добраахвотна толькі праз банк і на дамову з папячыцельскай радай. Гаворка ідзе пра любыя так званыя зборы: аказанне дапамогі ў рамонце класа або групы, закупка паперы для друкаркі, пітной вады. Пры гэтым ніякія квітанцыі кіраўнік установы адукацыі або апякунская рада не павінны прасіць у бацькоў навучэнцаў, - тлумачылі ў ведамстве.