Аўтамабілі «Джылі» будуць збіраць працоўныя з кіянкай

Барысаўскі завод набірае людзей, каб уручную выпраўляць корпусы аўтамабіляў.

На верасень, як вядома, запланаваны ўвод у эксплуатацыю новага завода СЗАТ «БелДжы», які паводле першапачатковых планаў павінен быў пачаць сваю працу ў пачатку студзеня гэтага года, піша выданне ex-press.by.

Тэрміны ўводу некалькі разоў пераносіліся, што выклікала заклапочанасць у Лукашэнкі, які даў даручэнне Камітэту дзяржкантролю разабрацца з прычынамі затрымкі.

Перад уводам у эксплуатацыю на канвееры новага завода павінны былі ў бесперапынным рэжыме цягам трох дзён сабраць пробную партыю ў 222 аўтамабілі. Тэрміны зборкі пробнай партыі таксама пераносіліся - апошні раз на жнівень. Месяц заканчваецца, аднак пакуль у СМІ не з'явілася трыумфальных паведамленняў. Але не выключана, што зборка пробнай партыі ўжо адбылася без асаблівага шуму.

Так ці інакш, мяркуючы з колькасці кітайцаў, якія з'яўляюцца на вуліцах Барысава, а таксама з абвестак пра набор рабочых на новае прадпрыемства, можна меркаваць, што пуск аўтазборачнай вытворчасці ў любым выпадку не за гарамі.

Якія спецыялісты патрабуюцца цяпер на БелДжы? Высвятляецца, самыя розныя, у тым ліку і рыхтоўшчыкі легкавых аўтамабіляў.

З прадстаўнікамі гэтай прафесіі сутыкаліся многія аўтамабілісты, вымушаныя аднаўляць свае машыны пасля дарожна-транспартных здарэнняў. Аднак рыхтоўшчыкі спатрэбіліся і заводу вытворчасці цалкам новых кітайскіх «Джылі».

Як нядаўна распавядаў журналістам віцэ-прэм'ер Сямашка, новы завод СЗАТ «БелДжы» ўніверсальны, вытворчасць наладжаная па поўным цыкле.

- Прадпрыемства рабатызаванае, можна зварыць любы корпус, трэба толькі задаць пэўную праграму, - падкрэсліў віцэ-прэм'ер.

Робаты робатамі, а працоўныя з кіянкай, атрымліваецца, зусім не лішняе на ўніверсальнай вытворчасці ў зборцы кітайскіх аўтамабіляў. Што, увогуле і не дзіўна.

Нядаўна ў байнэце цікавасць і шырокае абмеркаванне выклікаў артыкул уладальніка адной з беларускіх аўташкол, які набыў для навучання курсантаў дзве малалітражкі «Джылі». Адным з некалькіх непрыемных сюрпрызаў для набытчыка сталі розныя зазоры на кузавах аднолькавых аўтамабіляў.

Службовая інструкцыя рыхтоўшчыка кузаваў 3-га разраду:

Характарыстыка работ. Праўка пад афарбоўку абліцовачных дэталяў і вузлоў кузаваў грузавых аўтамабіляў і дэталяў і вузлоў кузаваў легкавых аўтамабіляў з дапамогай прылады для праўкі. Падганянне вузлоў, дзвярэй грузавых аўтамабіляў з даводкай зазораў і месцаў спалучэнняў. Падрыхтоўка дэталяў і вузлоў кузаваў легкавых аўтамабіляў пад аплаўленне. Зачыстка ўнутраных і аплаўленных прыпоем месцаў кузава. Ліквідацыя перакосаў праёмаў і кузава ў цэлым пры аднаўленні яго геаметрычных формаў і параметраў. Рамонт пашкоджаных дэталяў кузава з заменай або шляхам прымянення рамонтных уставак з падрыхтаваных дэталяў кузава або ліставога металу з наданнем яму формы дэталі.

Павінен ведаць: тэхналогію і метады праўкі пад афарбоўку абліцаваных дэталяў і вузлоў кузаваў грузавых аўтамабіляў і дэталяў і вузлоў кузаваў легкавых аўтамабіляў; правілы падрыхтоўкі дэталяў і вузлоў кузаваў пад аплаўленне; спосабы выпраўлення дэфектаў; прынцып працы інструмента для праўкі, прычыны ўзнікнення ўнутранага напружання і дэфармацыі ў зварных дэталях, меры па іх папярэджанні і спосабы іх ліквідацыі; уласцівасці металаў, якія праяўляюцца пры праўцы.