Беларускіх гастарбайтэраў у Расеі стане больш
4- 30.08.2017, 10:39
- 18,334
Іх колькасць можа вырасці да 700 тысяч чалавек.
Рост заробку ў Беларусі недастатковы для прадухілення адтоку працоўных рэсурсаў за межы краіны.
З улікам далейшай аптымізацыі колькасці працоўных калектываў у Беларусі і нястачы працоўнай сілы ў Расеі разрыў паміж заробкамі павялічыцца, прагназуюць экспэрты «Беларусь у фокусе».
«У большасці тыпаў дзейнасці заробак расейскіх работнікаў пераўзыходзіць заробак работнікаў беларускіх прадпрыемстваў, у асобных галінах - нафтаперапрацоўцы, здабычы нафты сферы паветранага транспарту - удвая больш, - адзначаецца ў аглядзе «Беларусь у фокусе».
Супастаўленне заробкаў у Расеі і Беларусі значна ўплывае на міграцыйныя працэсы працоўных рэсурсаў у Беларусі. Заробкі ў Беларусі знаходзяцца ў дыяпазоне ад 50 да 80% ад узроўню заробкаў у Расеі.
«Пры ўзроўні заробкаў на ўзроўні 75-80% адток працоўных рэсурсаў у Расею скарачаецца, але такое супастаўленне хутка заканчваецца з чарговай дэвальвацыяй, - канстатуюць экспэрты. - Пры ўзроўні заробкаў у Беларусі сумай ад 50 да 65% адток грамадзян Беларусі ў Расею зноў нарастае».
Паводле стану на 1 чэрвеня 2017 года, са звестак Федэральнай міграцыйнай службы, больш за 670 тысяч грамадзян Беларусі знаходзіліся ў Расеі.
Аднак сітуацыя з працоўнымі рэсурсамі складваецца ў гэтых краінах па-рознаму. У Беларусі за першыя 6 месяцаў 2016 года было звольнена на 35,7 тысяч чалавек больш, чым прынята на працу. І ў якасці беспрацоўных гэтыя звольненыя супрацоўнікі не зафіксаваныя ў афіцыйных службах занятасці, бо афіцыйнае беспрацоўе скарацілася за гэты перыяд з 0,8% да 0,7% на 1 ліпеня 2017 года.
У Расеі назіраецца нястача працоўных рэсурсаў, а колькасць беспрацоўных дасягнула мінімуму за апошнія паўтара года паводле метадалогіі Міжнароднай арганізацыі працы.
З прагнозаў экспэртаў, заробкі ў Расеі будуць павялічвацца больш хуткімі тэмпамі ў параўнанні з Беларуссю, розніца ў аплаце працы ў шэрагу галін стане дастатковай для пераезду ў Расею, а далейшая аптымізацыя працоўных калектываў у Беларусі будзе спрыяць пераходу свабодных працоўных рэсурсаў з Беларусі ў Расею.
«Гэта прывядзе да павелічэння колькасці беларускіх грамадзян у Расеі да 700 тысяч чалавек», - мяркуюць аўтары агляду.
У той жа час, з іх ацэнкі, найбольш кваліфікаваныя кадры з Беларусі будуць разглядаць варыянт працаўладкавання ў краінах ЕЗ з больш прывабным, у параўнанні з Беларуссю і Расеяй, заробкам.