Неспадзяванкі абноўленага дэкрэта аб «дармаедах»
33- 4.08.2017, 9:56
- 34,555
Лукашэнка ўпэўнена капае сабе яму.
Да першага кастрычніка павінен з'явіцца абноўлены дэкрэт №3 «Аб папярэджанні сацыяльнага ўтрыманства», заявіў Лукашэнка.
Пры гэтым кіраўнік падкрэсліў:
- Грамадства павінна ведаць, што ніякага скасавання дэкрэту №3 быць не можа. Я ўжо матываваў гэтае пытанне: як мінімум паўмільёна у нас беспрацоўных людзей. З іх 200 тыс. мы можам вызваліць: шматдзетных, хворых, інвалідаў, людзей, якія, можа, і хочуць працаваць, але ў іх не атрымліваецца ў сілу жыццёвых абставінаў. Але 300 тысяч дзе? Таму дэкрэт №3 - гэта 300 тысяч тых, хто павінен працаваць, але не працуе. І мы іх павінны прымусіць працаваць.
Кавалкін: Усе гэтыя лічбы ўзятыя са столі
- Па-першае, у словах змяшчаецца супярэчнасць дзейнасці Канстытуцыі, якая забараняе прымусовую працу. А кіраўнік дзяржавы так і кажа, што трэба прымусіць людзей працаваць. Гэта, на мой погляд, вельмі важны момант, бо прэзідэнт мае намер парушыць канстытуцыю. І робіць гэта публічна. Другі момант. Лукашэнка ўважае гэты дэкрэт правільным у ідэалагічным плане. У яго ёсць нейкае ўласнае разуменне «вышэйшай справядлівасці», адпаведна якой ён і хоча рэалізаваць прапісаныя ў дэкрэце меры, - заявіў «Заўтра тваёй краіны» кіраўнік праекта «Кошт ураду» Уладзімір Кавалкін.
Да чаго гэта прывядзе? Са слоў экспэрта, можа паўтарыцца вясновы варыянт, калі на вуліцы гарадоў выйшлі абураныя беларусы:
- Калі толькі чыноўнікі не пакінуць у абноўленым дэкрэце велізарную колькасць шчылін, якія дазволяць практычна ўсім грамадзянам, якія трапілі пад дзеянне дакумента, не плаціць збор. Калі ж дэкрэт зноў закране вялікую колькасць беларусаў, варта чакаць лакальных акцый пратэсту.
На думку экспэрта, кіраўнік дзяржавы зусім не разумее таго, які ўзровень жыцця сёння ў малых гарадах.
- На самай справе, усе гэтыя лічбы ўзятыя са столі. З тых, каго ўважаюць афіцыйна беспрацоўнымі, многія з'ехалі на заробкі ў Расею. Нейкая частка беларусаў не можа знайсці працу, таму што ў краіне крызіс і працаўладкавацца ў сённяшніх умовах вельмі складана.