Суд над Ларысай Шчыраковай ператварыўся ў акцыю пратэсту

Гомельцы апырскалі будынак суда, «каб не смярдзела».

У судзе Гомельскага раёна, дзе праходзіў суд над журналісткай-фрылансеркай Ларысай Шчыраковай, гомельцы правялі флэш-моб, піша сайт тэлеканала «Белсат».

Салідарныя з журналісткай надзелі рэспіратары або марлевыя павязкі і прынеслі пульверызатар з надпісам «каб не смярдзела».

Сама ж журналістка прыйшла са звязкам часнаку, каб народнымі сродкамі «адпужваць нячыстую сілу».

Прысутныя на судзе таксама трымалі аркушы з надпісамі «Не магу маўчаць» і «Я збіраю і распаўсюджваю інфармацыю. Я такі, як Ларыса Шчыракова».

Прычына, з якой улады гэтым разам пераследуюць журналістку - сюжэт пра тое, як гомельскія ўлады дазволілі будаваць жыллё ў прыватным сэктары на вуліцы Беларускай, Пясочным і Чкалаўскім праездах, а потым, засланіўшыся генпланам, наважылі аддаць дамы пад руйнаванне.