Лукашэнка - міністру прыроды: Разбярыцеся ўжо, што там пад зямлёй

Дыктатар прызначыў новага кіраўніка Мінпрыроды і раскрытыкаваў якасць прагнозаў ад Гідрамета.

Лукашэнка раскрытыкаваў якасць прагнозаў надвор'я, якія знаходзяцца ў веданні дэпартамента гідраметэаралогіі Міністэрства прыродных рэсурсаў і аховы навакольнага асяроддзя. Пра гэта дыктатар заявіў сёння, прызначаючы на пасаду міністра Андрэя Худыка, паведамляе прэс-служба Лукашэнкі.

«Іх прагнозы часам не тое што чытаць... Часам, прачытаўшы, хочацца, каб наогул нічога там не прагназавалі. Там больш за тысячу чалавек. Займіцеся гэтай структурай і навучыцеся працаваць у структуры - зусім невялікая - у нашым войску ёсць (у ВПС і войсках СПА) - на тры дні інфармацыя па гадзінах, і ні разу не памыляліся», - сказаў дыктатар.

«І калі я чытаю вашу інфармацыю, а я кожны дзень яе атрымліваю, у мяне жаданне проста разагнаць гэтую арганізацыю. Калі не ўмееце працаваць, звяжыцеся з вайскоўцамі ўжо, навучыцеся ў іх працаваць», - дадаў Лукашэнка.

Прызначаючы Андрэя Худыку на пасаду міністра прыродных рэсурсаў і аховы навакольнага асяроддзя, правадыр акцэнтаваў увагу новага міністра на выяўленні новых пакладаў карысных выкапняў.

«Былому міністру была пастаўлена вельмі сур'ёзная задача аб прыродных рэсурсах. Што мы ведаем пра нашу краіну? Тое, што на паверхні, мы гэта бачым. А вось што там - пад зямлёй - не ўсё. Таму ваша задача - разабрацца, што там, пад зямлёй. І перш за ўсё тое, што нам вельмі неабходна сёння. Разумееце, пра што ідзе гаворка», - сказаў прэзідэнт.

«Прырода - гэта дар Божы, мы яго павінны захаваць і яшчэ ў найлепшым стане перадаць сваім дзецям і ўнукам, - сказаў Лукашэнка. - Таму займіцеся сур'ёзна, як вы гэта ўмееце рабіць. Займіцеся навядзеннем парадку і дайце вынік у рэсурсах і абароне нашай прыроды. Усе гэтыя кар'еры, жывёлагадоўчыя фермы, адкуль жыжа ў раку цячэ...».

Нагадаем, раней кіраўніком Міністэрства прыродных рэсурсаў і аховы навакольнага асяроддзя быў Андрэй Каўхута. 8 чэрвеня стала вядома, што ён адхілены ад працы, у дачыненні да яго праводзіцца праверка - яго падазраюць у службовым падлогу.