Палітвязень Ігар Комлік застаецца пад вартай

Улады адхілілі прашэнне бухгалтара РЭП аб змене меры стрымання.

Як стала вядома праваабарончаму цэнтру «Вясна», 15 верасня суд Партызанскага раёна разгледзеў скаргу Ігара Комлік на меру стрымання - утрыманне пад вартай. У скарзе ён прасіў змяніць меру стрымання, бо ўважае што яна ўжытая да яго беспадстаўна і ў утрыманні яго пад вартай падчас следства няма неабходнасці.

Суддзя Наталля Дзядкова наважыла, што мера стрымання абраная законна і абгрунтаваная, бо Ігар Комлік абвінавачваецца ў цяжкім злачынстве. Яна пакінула пастанову намесніка генеральнага пракурора без зменаў, а скаргу без задавальнення. У суд абвінавачанага не дастаўлялі.

Абаронца Ігара Комлік накіравала скаргу ў Менгарсуд на пастанову суда Партызанскага раёна, які прызначыў яе разгляд на 19 верасня.

Ігар Комлік знаходзіцца пад вартай ужо больш за месяц.

Нагадаем, 2 жніўня 2017 года супрацоўнікі Дэпартамента фінансавых расследаванняў Камітэта дзяржаўнага кантролю Беларусі правялі ператрус і канфіскацыю кампутараў і фінансавых дакументаў у офісе прафзвязу РЭП і цэнтральнага офіса БНП. Былі (затрыманыя старшыня РЭП Генадзь Фядыніч і бухгалтар Ігар Комлік. Фядыніча дапыталі і адпусцілі, а Ігар Комлік заставаўся пад вартай.

Праваабарончыя арганізацыі Беларусі 3 жніўня заявілі, што лічаць Ігара Комліка палітвязням. Са слоў праваабаронцаў, распачатая супраць прафзвязных лідараў крымінальная справа палітычна матываваная, звязаная з актыўнай прафзвязнай дзейнасцю і мірным ажыццяўленне права на свабоду асацыяцый.

У падтрымку прафзвязных лідараў выступілі Глабальны саюз IndustriALL і Міжнародная канфедэрацыя прафзвязаў, якія заклікалі ўлады Беларусі спыніць пераслед Генадзя Фядыніча і Ігара Комліка.

Акрамя таго, з сумеснай заявай выступілі Абсерваторыя ў абароне праваабаронцаў, партнёрская праграма FIDH і Сусветнай арганізацыі супраць катаванняў (OMCT), якія таксама заклікалі беларускі ўрад зняць усе абвінавачванні з Ігара Комлік і спыніць крымінальны пераслед лідараў прафзвязных арганізацый за іх мірную дзейнасць.