Замест школьнікаў на бульбу «рэкрутуюць» санітарак з шпіталяў і настаўнікаў

Улады хутка знайшлі замену дзіцячай працы.

Год таму школьны збор бульбы ў калгасе скончыўся загубай дзяўчынкі пад коламі аўтамабіля. Школьнікаў на калгасныя палеткі больш не накіроўваюць. Іх месца занялі настаўнікі і санітаркі.

У ААТ "Навасёлкі-Лучай" Пастаўскага раёна мяркуюць, што гэта нармальна, маўляў, грошы ўсім будуць выплачаныя:

"Настаўнікам будуць выплачаныя грошы за гэта. Укладзенае пагадненне паміж прадпрыемствам і школамі, - распавядае Еўрарадыё прадстаўнік калгаса Уладзіслаў Шаршнёў. - Настаўнікі збольшага прыязджаюць у суботу. У будныя дні збіраць бульбу мы ходзім, сельсавет, з санаторыя "Ветразь", з лякарні даюць людзей".

Але навошта калгасу так шмат бульбы, цэлых 30 гектараў, калі самі сабраць не могуць!? Галоўны аграном ААТ "Навасёлкі-Лучай" Вера Мукель не мяркуе, што гэта шмат: "Ураджай, можа, быў бы і ніштаваты, але ўсё заліло вадой, няма магчымасці збіраць. Цяпер ураджай даходзіць да 150 цэнтнераў з гектара (у два разы менш, чым у краіне). Штогод мы саджаем 30-40 гектараў, як нам раён загадае, але няма збыту на бульбу. Цяпер ніхто не хоча браць, амаль што няма куды яе падзець".

У калгасе "Усход-Агра", дзе летась загінула школьніца, збіраюць бульбу з 150 гектараў, але наогул без дапамогі школьнікаў і настаўнікаў. Дырэктар калгасу Юрый Матус распавядае, што прыцягнулі да бульбы толькі людзей з біржы працы.

Пастаўская сярэдняя школа №2, дзе настаўнікі ідуць працаваць у суботу-нядзелю на калгаснай бульбе, не вельмі задаволеная. Але выйсця з сітуацыі не бачыць:

"У нас выязджаюць толькі тыя, у каго ў суботу няма гурткоў і факультатываў. Выязджалі два разы, апошні раз было 13 педагогаў разам са мной і 8 чалавек з тэхнічнага персаналу", - расказвае Еўрарадыё дырэктар школы Ігар Мадзвейка.

Дырэктар школы і не спадзяецца на вялікія сумы: "Я задаваў гэтае пытанне намесніку ў ідэалогіі, і ён адказаў наступнае, цытую: "Вы, па-першае, дарослыя, значыць, у вас будуць меншыя тарыфы, чым у дзяцей. Па-другое, гэта будзе залежаць ад ураджайнасці і якасці збірання, гэта значыць, ад танажу".

Акрамя настаўнікаў на бульбу выходзіць і персанал Пастаўскай раённай лякарні. Гэта іхні падшэфны калгас, таму "мы абавязаныя":

"Мы абавязаныя ім дапамагаць, калі яны просяць. Ад шпіталю адпраўляецца 6-7 чалавек. Усё гэта адбываецца ў працоўны час, ніхто ў суботу-нядзелю нікога не ганяе. Здымаем санітарак і санітараў са змены і адпраўляем на палетак, калі яны вяртаюцца раней, чым заканчваецца іхні працоўны дзень, то яны дапрацоўваюць сваю змену, - тлумачыць Еўрарадыё галоўная медсястра Святлана Казакевіч. - Медсясцёр не адпраўлялі, яны ж павінны надаваць дапамогу хвораму".

У Міністэрстве адукацыі не бачаць праблемы ў тым, што настаўнікі працуюць на палетках у вольны ад асноўнай працы час. Але кажуць, што настаўнікаў не павінны прымушаць гэта рабіць замест заняткаў.