У Маскве другі дзень пратэстуюць таджыкі

Пратэсты пачаліся ўвечары 20 верасня.

ГЦ «Масква» ў Любліно пачалі штурмаваць мігранты з Таджыкістана. Прычынай незадаволенасці стала нібыта збіццё аднаго з працаўнікоў за тое, што ён не заплаціў «даніну» ахове ГЦ, паведамляе «Медуза».

Паводле розных ацэнак, пасля заканчэння працоўнага дня да гандлёвага цэнтра на Ціхарэцкім бульвары прыйшло ад некалькіх сотняў да тысячы чалавек. Некаторыя з іх спрабавалі зламаць брамы і прарвацца на тэрыторыю гандлёвага цэнтра, але паліцыя спыніла іх. Афіцыйна МУС заяўляла пра 90 затрыманых - іх дзеянні паліцыя расцаніла як «спробу групавога парушэння грамадскага парадку» і распачала крымінальную справу аб хуліганстве. Кіраўнік агульнарасейскага грамадскага руху «таджыкскія працоўныя мігранты» Кароман Шарыпаў заявіў «Медузе» пра 250 затрыманых. З ягоных слоў, гэта былі работнікі рынку, некаторыя з іх дагэтуль знаходзяцца ў аддзелах паліцыі.

«Прыехаў АМАП і вельмі выразна спрацаваў. Усіх затрымалі, нікога не збілі», - распавёў «Медуза» кіраўнік Федэрацыі мігрантаў Расеі Вадзім Кажаноў. Паводле яго ацэнкі, было затрымана менш за 100 чалавек.

Збіццё ці правакацыя?

Паводле звестак руху «таджыкскія працоўныя мігранты», 20 верасня, а 14.30, супрацоўнікі службы бяспекі ГЦ «Масква» збілі 27-гадовага Наўруза Закірава, які месяц таму прыехаў у Маскву з Таджыкістана і працаваў на рынку грузчыкам і возным вазку. Закірава нібыта пачалі біць праз тое, што ён не заплаціў ахоўнікам «даніну» за магчымасць спакойна працаваць - 700 рублёў у дзень. Са слоў Каромана Шарыпава, ахоўнікі доўга збівалі Закірава, потым выкінулі яго дакументы ў смеццевую скрыню, а потым абгарнулі Закірава, які быў без прытомнасці, у белую прасціну і выкінулі яго на сметнік за межы рынку.

Сведкамі збіцця сталі іншыя работнікі рынку з Таджыкістана, якія сабраліся ля адміністрацыйнага будынка рынку і запатрабавалі пакараць ахоўнікаў. Таксама да будынка прыйшлі іншыя работнікі рынку і мігранты, якія працуюць непадалёк. Самога Закірава да гэтага моманту ўжо павезлі ў бальніцу №68.

Вадзім Кажаноў з федэрацыі мігрантаў у размове з «Медуза» заявіў, што ніякага збіцця не было і Закіраў трапіў у бальніцу праз тое, што ў яго мог здарыцца прыступ эпілепсіі. Лекар бальніцы №68 заявіў тэлеканалу НТВ, што слядоў збіцця на Закіравым няма, але з «вялікай нацяжкай» можна дыягнаставаць страсенне мозгу сярэдняй ступені цяжкасці.

У расейскім прадстаўніцтве міграцыйнай службы Таджыкістана пацвердзілі «Медузе», што Закіраў быў збіты. «Такі факт быў, у абставінах цяпер разбіраюцца расейскія праваахоўныя органы», - сказаў прэс-сакратар ведамства Ібрагім Ізмайлаў. Паліцыя ўжо распачала крымінальную справу паводле артыкула «пабоі».

Пацярпелы застаецца ў бальніцы, акцыі пратэсту працягваюцца

У расейскім прадстаўніцтве міграцыйнай службы Таджыкістана «Медуза» паведамілі, што 21 верасня да Закірава ў бальніцу ездзілі прадстаўнікі міграцыйнай службы і амбасады, яны пагаварылі з пацярпелым. Цяпер ён знаходзіцца ў здавальняючым стане і можа размаўляць, яму дыягнаставалі страсенне мозгу.

Паводле звестак крыніцы ТАСС у праваахоўных органах, ужо раніцай 21 верасня некалькі мігрантаў спрабавалі правесці паўторную акцыю пратэсту і правакавалі ахову ГЦ. Пасля папярэджання ад паліцыі яны разышліся, затым паліцыя сцягнула да рынку дадатковыя сілы - там дзяжураць паліцэйскія і байцы АМАП Росгвардыі. Павялічылася і колькасць пратэстоўцаў мігрантаў - днём да ГЦ прыйшло блізу 200 чалавек. Як заявілі РІА «Новости» ў сталічным упраўленні МУС, каля рынка праходзяць "прафілактычныя мерапрыемства". Крыніцы агенцтва паведамляюць, што ў гандлёвым цэнтры правяраюць выкананне міграцыйнага і працоўнага заканадаўства. Удзень паліцыя пачала разганяць мігрантаў. ТАСС паведамляе са спасылкай на крыніцу ў праваахоўных органах, што затрыманыя больш за 10 чалавек. Паводле звестак Вадзіма Кажанова, затрыманых было менш - 4 чалавекі.

«Правакатары сабраліся недзе да паловы трэцяга, змайстравалі тут невялікую шуміху. Затрымалі літаральна чатырох чалавек, астатнія разбегліся», - сказаў ён. У сацсетках з'яўляліся паведамленні аб масавай бойцы паміж паліцыяй і мігрантамі, але гэтыя звесткі не пацвердзіліся.

Кажаноў дадаў, што цяпер у ГЦ «Масква» працуе аператыўны штаб, бо «сітуацыю нельга пакідаць на самацёк».

Паводле звестак руху «таджыкскія працоўныя мігранты», толькі за апошні час ахоўнікі ГЦ «Масква» жорстка збілі пяцярых мігрантаў. Нібыта ў памяшканні аховы ГЦ ёсць нават нейкі «пакой катаванняў», дзе з мігрантаў выбіваюць «даніну» за магчымасць працаваць на рынку. У адміністрацыі ГЦ «Масква» адмовіліся пракаментаваць «Медузе» гэтыя заявы.