РЭП: Дзякуючы «Хартыі-97» выпадкі парушэння правоў працоўных станавіліся здабыткам грамадскасці

Пацярпелыя ад самавольства наймальнікаў работнікі ўспрымаюць публікацыю на Charter97.org, як спосаб абароны сваіх правоў.

24 студзеня Міністэрства інфармацыі Беларусі заблакавала папулярны інтэрнэт-рэсурс Charter97.org. Вельмі многія выпадкі парушэння працоўных правоў, якімі займаўся прафзвяз РЭП, станавіліся здабыткам грамадскасці менавіта дзякуючы сайту «Хартыі-97», піша сайт praca-by.info.

Работнікі, якія пацярпелі ад самавольства наймальнікаў, часцяком успрымаюць публікацыю на папулярным рэсурсе як спосаб абароны сваіх правоў. І сапраўды, чыноўнікі і наймальнікі чытаюць гэты сайт і ў многіх выпадках вымушаныя рэагаваць на грамадскі рэзананс. Многія людзі ўпершыню даведаліся аб незалежным прафзвязе РЭП менавіта з публікацый на сайце «Хартыі-97».

Блакаванне сайта «Хартыя-97» - вялікая страта для свабоды выказвання меркавання ў Беларусі і недапушчальнае абмежаванне доступу да інфармацыі. У дэмакратычным грамадстве чалавек павінен мець магчымасць самастойна выбіраць крыніцы, з якіх ён атрымлівае інфармацыю аб тым, што адбываецца ў краіне і свеце.

Нагадаем, што 24 студзеня рэжым Лукашэнкі заблакаваў незалежны інфармацыйны рэсурс Charter97.org. Блакаванне пацвердзіў першы намеснік міністра інфармацыі Ігар Луцкі.

Падрабязная інструкцыя пра тое, як абысці блакаванне сайта Charter97.org, знаходзіцца тут.