«Дарагі» патрыярх: колькі візіт Кірыла каштаваў беларускім епархіям
10- 17.10.2018, 7:48
- 31,687
На што за два дні можна выдаткаваць гэтыя грошы?
У Менску адбыўся Сінод Расейскай праваслаўнай царквы (РПЦ), па выніках якога расейскія іерархі пастанавілі разарваць стасункі з Канстанцінопальскім патрыярхатам. Аўтаматычна тое самае зробіць і БПЦ, як частка Расейскай праваслаўнай царквы.
Усе гэтыя багатыя на падзеі тры дні, калі ў Беларусі прысутнічалі чальцы расейскага Сінода, забяспечваліся бесперабойнай лагістыкай і абслугоўваннем гасцей.
Жыллё, абеды, раз'езды, падарункі... Хто гэта ўсё аплачваў? Нешта выдаткоўвала дзяржава, але немалыя грошы сабралі і з цэркваў.
Пра якую ж суму ідзе гаворка?
Наколькі атрымалася высветліць «Нашей Ниве», у гэтым годзе ніякіх пісьмовых загадаў мітрапаліта Паўла пра збор грошай не было, пажаданні выказваліся ў вуснай форме.
Але мы знайшлі лічбы па мінулы візіт патрыярха Кірыла ў Менск і Берасце - гэта было ў 2015-м, з 20 да 22 чэрвеня.
Па колькі ж тады збіраліся беларускія епархіі? Лічбы ўражваюць: за ўсё гэта $100 000!
Мы здабылі адпаведны дакумент, завізаваны мітрапалітам Паўлам тры гады таму. У «Плане ўнясення мэтавых унёскаў на візіт Свяцейшага Патрыярха Маскоўскага» ад 13.05.2015 за подпісам галоўнага бухгалтара А.І.Кахно фігуруюць такія лічбы.
| Епархия | Сумма в долларах США |
| Минская | 15 000 |
| Бобруйская | 5 000 |
| Борисовская | 5 000 |
| Брестская | напротив Брестской епархии цифра не стоит, так как патриарх прилетал в Брест, и они несли траты |
| Витебская | 8 000 |
| Гомельская | 10 000 |
| Гродненская | 7 000 |
| Лидская | 5 000 |
| Могилёвская | 7 000 |
| Молодеченская | 6 000 |
| Новогрудская | 5 000 |
| Пинская | 10 000 |
| Полоцкая | 7 000 |
| Слуцкая | 5 000 |
| Туровская | 5 000 |
| Всего | 100 000 |
На што за два дні можна выдаткаваць сто тысяч даляраў?
Кіраўнік сінадальнага інфармацыйнага аддзела Беларускай праваслаўнай царквы Сяргей Лепін адказаў «Нашай Ніве», што ён не ў курсе сумы мэтавых унёскаў ні 2015 года, ні 2018 годзе.
«Наколькі мне вядома, у гэтым годзе сума не ўстанаўлівалася і не абмяжоўвалася», - сказаў нам Лепін.
Дасведчаныя людзі кажуць, што цяперашнія ўнёскі маглі быць у агульнай сумай вялікімі, бо ў 2015-м світа патрыярха была больш сціплай - разам з ім не было чальцоў Сінода РПЦ.
Ну і гасцявалі яны даўжэй на адзін дзень.
Шараговых святароў ўразіла шматлікасць аховы патрыярха. За крытыку яе быў адхілены ад служэння менскі бацюшка Аляксандр Шрамко. Раскошны лад жыцця патрыярха Кірыла выклікаў нараканні і раней: яшчэ ў 2012 годзе стала вядома пра яго гадзіннік коштам 30 тысяч еўраў.
Варта адзначыць, што і тады і цяпер асобныя графы расходаў наўпрост фінансаваліся беларускай дзяржавай, напрыклад: у Менску патрыярх Кірыл звычайна прылятае на ўрадавым самалёце беларускага боку, які забірае яго з Масквы.
