«Лукашызм у сто разоў горшы»
26- 1.11.2018, 10:39
- 23,631
Беларусы - пра сітуацыю з БРСМ.
Скандал, які выліўся напярэдадні, усё яшчэ разгортваецца. «Радыё Свабода» апублікавала відэа, знятае навучэнцамі адной са сталічных школ (пазней высветлілася, што гаворка ідзе пра гімназію №31). Адміністрацыя з дапамогай пагроз і абраз змушала падлеткаў уступіць у пралукашэнкаўскую арганізацыю БРСМ. Шмат каментароў з'яўляецца ў сацыяльных сетках, паведамляе «Белсат».
Вядомы палітычны аглядальнік Аляксандр Класкоўскі кажа:
«А хтосьці збіраўся раздаваць БРСМу аўтаматы. Ды туды ж заганяюць ледзь не пад руляй».
А вось Аляксандр Сцепаненка піша так на сваім ФБ:
«Мабыць, нездарма БРСМ уважае сябе за пераемніка ВЛКСМ. Прынамсі горшае ад камсамола - прымусовае ўступленне - яны дакладна перанялі».
Яму адказвае ў каментары Таццяна Зялко:
«Ды не! Як па мне, то лукашызм у сто разоў горшы. Я не апраўдваю ні камсамол, ні той час, але сённяшняе ўжо пераплюнула усе каноны, магчымыя і немагчымыя».
Пад тысячу каментароў з'явілася і ўласна пад скандальным ролікам на youtube. Піша карыстальнік Radix:
«Жывуць паводле настулату «я начальнік, ты дурань». Для іх асобы падначаленага не існуе наогул, для іх дзеці - ніхто. Іх не проста можна, а трэба сістэматычна зневажаць, а кожны супраціў ціснуць у зародку».
У нас атрымалася датэлефанавацца да 31-й сталічнай гімназіі і пагутарыць з намесніцай дырэктара Таццянай Чумавіцкай:
«Я думаю, што гэта не зусім тэлефонная размова, праўда? У кожным выпадку ўсё годна, усё прыгожа, усё правільна...»
Пагаворым з былым сакратаром БРСМ Венедыктам Кляўзэ:
«Інфармацыю гэтую я прачытаў яшчэ ўчора. Адразу падняўся ціск, таму што такі ўзровень аргументацыі, каб запрасіць людзей у БРСМ, не мае права быць. Я ў шоку ад інструменту, які цяпер выкарыстоўваецца. Цягам тых трох гадоў, калі я быў у БРСМ, у тым ліку быў сакратаром, БРСМ знаходзіўся, мне здаецца, на іншым узроўні развіцця. Ён толькі нараджаўся, таму там працавалі танчэй: больш схілялі, паказвалі плюсы, заваблівалі нейкімі зніжкамі, прэферэнцыямі пры размеркаванні і атрыманні месца ў інтэрнаце...»
Міністэрства адукацыі спачатку казала пра шок ад пачутага, але цягам дня шок прайшоў, і з'явілася афіцыйная заява:
«Незразумелае ні паходжанне роліка, ні тое, ці такая сітуацыя мела месца ў рэчаіснасці, ці гэта чарговая фэйкавая пастаноўка. І Міністэрства адукацыі не збіраецца праводзіць якіх-небудзь расследаванняў на гэты конт, а тым больш даваць каментары. Разам з тым, пазіцыя міністэрства выразная. Недапушчальна прымусовае ўступленне ў чальцы БРСМ».
Працяг размоў - у відэасюжэце.