Беларус працягвае здзіўляць свет покера

Мікіта Бадзякоўскі дамагаецца поспеху ў турнірах з буйнымі прызавымі.

Гэтым разам Мікіта Бадзякоўскі заняў чацвёртае месца ў $250,000 Super High Roller Championships, які праходзіў 13-15 лістапада ў рамках Caribbean Poker Party на Багамскіх выспах, піша «Беларусь и мир».

У турніры ўзялі ўдзел 34 гульцы, і кожны з іх заплаціў уступны ўнёсак у 250 тысяч даляраў. Прызавы фонд у выніку склаў 7,52 млн.

Гэтыя грошы павінны былі падзяліць 4 пераможцы, прычым з вялікім разрывам па сумах: чацвёртае месца - 710 тысяч даляраў, трэцяе - 1,42 млн, другое - 2,43 млн, першае - 3,69 млн.

У фінале беларус цалкам мог прэтэндаваць і на трэцяе месца, але ў апошняй для сябе раздачы саступіў амерыканцу Шону Вінтэру. У яго былі два каралі супраць двух тузоў у спаборніка.

Такім чынам, Бадзякоўскі атрымаў 710 тысяч даляраў прызавых. Ён дадаў іх да свайго вялікага «багажу» ў больш чым 20 млн за ўсю кар'еру ў «жывым» покеры.

* * *    * * *    * * *

Дадамо, што інфармацыя пра выйгрыш гульцоў у покер не адлюстроўвае іх рэальны асабісты грашовы баланс. Па-першае, нават пры выйгрышы з атрыманай у выніку сумы заўсёды варта адняць грошы ўступнага ўнёску, што ўнесены гульцом.

Па-другое, нярэдкія выпадкі, калі крыніцай сродкаў унёску з'яўляюцца інвестары, таму гульцу дастаецца толькі частка прызавых. Па-трэцяе, на кожны выйгрыш даводзіцца шэраг пройгрышаў, якія застаюцца «за кадрам», але гулец пры гэтым пазбаўляецца сумы ўнёску.